بەشە بەنزینی سلێمانی لەبەغداوە زیاد دەکرێت

SNN

وەزارەتی نەوتی عێراق رەزامەندی دەربڕی لەسەر زيادکردنی بڕی 180 هەزار ليتر بەنزين بۆ شاری سلێمانی، بە وتەی وەزيری نەوت “ئەمە یەکەم جارە ئەو ڕێژە زۆرە بۆ پارێزگای سلێمانی تەرخان بکرێت”.

د.بڕیاڕ ڕەشیـد ئەندامی ئەنجومەنی نوێنەرانی عێراق بە SNNی راگەياند: دوای کۆبوونەوەمان لەگەڵ سەرۆکی ئەنجوومەنی پارێزگایی سلێمانی لە بەرواری ۱۰ی٤، لەبەرواری ۱۲/ ٤ /۲۰۲۲  سەردانی حامد زۆبەعی بریکاری وەزارەتی نەوتی عێراق بۆ کاروباری دابەشکردنی سوتەمەنی کرد،  بەمەبەستی زیادکردنی بەشەبەنزینی پارێزگای سلێمانی بریکاری وەزیر لە ۱۲/٥/۲۰۲۲ بە نوسراوی ژمارە۱۳٤٨۷ ئاگاداری کردینەوە کـە ڕەزامەندی دەربڕیوە لەسەر زیادکردنی بڕی ۱٨۰ هەزار لیتر، بەڵام بەهۆی گرفتی کەمی بەرهەم و زۆری داوا لەسەر بەنزین لەپارێزگاکانی تر ئەوکات ئەم ڕەزامەندیە جێبەجێ نەکرا.

راشيگەياند: بەمەبەستی بەلارێدانەبردنی داواکەمان میدیاکانمان لێ ئاگادارنەکردەوە، بەڵام بەبێ دابڕان ماوەی زیاتر لە سێ مانگـە بەوردی و بەهێمنی لۆبی بۆجێبەجێکردنی ئەم داوایە دەکەم کەخواستی سەرجەم خەڵکی پارێزگایی سلێمانیە خۆشحاڵانە ئەمڕۆ بەزارەکی ئاگادارکراینەوە کە بەڕێز وەزیری نـەوت ڕەزامەندی دەربڕیوە لەسەر زیادکردنی ئەو بەشە بەنزینە بۆ پارێزگای سلێمانی کە ئێستا  کۆی گشتی بەنزینی نێردراو لەبەغدا بۆ سلێمانی بەپێی داتایی وەزارەتی نەوت ٥٤۰ هەزار لیتر بەنزینـە.

باسی لەوەشکرد: بەم زووانـە بەگوێرەی بەڵێنەکانی وەزارەتی نەوت دەگاتە سلێمانی و هەر بەپێ قسەی خودی وەزیری نەوت “ئەمە یەکەمین جارە ئەو ڕێژە زۆرە بڕیاری لێ بدرێت بۆ پارێزگایی سلێمانی ترخان بکرێت”.

د.بڕيار وتيشی “بەوهیوایەی ئەم زیادەیە ببێتە هۆکارێک بۆ دابەزاندنی نرخی بەنزینی بازرگانیش لە سلێمانی کەمکردنـەوەی بارگرانی سەرشانی هاووڵاتیان”.