“ئێمە لەگەڵ كەمكردنەوەی كورسی كۆتاكان نین بەڵكوو لەگەڵ ڕێكخستنەوەیانداین”
زیاد جەبار، سەرۆكی فراكسیۆنى یهكێتى لە پەرلەمانی كوردستان | فۆتۆ: پهرلهمانى كوردستان
SNN-عەلی حەمە سەعید
سەرۆكی فراكسیۆنی یەكێتی لە پەرلەمانی كوردستان ئاماژە بەوەدەكات، ئێمە هەرگیز لەگەڵ ئەوەدا نەبووین كە ژمارەی كورسی كۆتا و كەمایەتییە نەتەوەكان كەمبكرێنەوە چونكە ئەوە داواكارییەكی سەرۆك مام جەلال بوو بۆ ئەوەی كەمایەتییەكان نوێنەری ڕاستەقینەی خۆیان هەبێت لەپەرلەمان، بەڵام نەك بەم شێوەیەی ئێستا هەیە بۆیە داوای ڕێكخستەوەی ئەو كورسیانەمان كردووە.
زیاد جەبار، سەرۆكی فراكسیۆنی یەكێتی لەپەرلەمانی كوردستان بە SNNی ڕاگەیاند: بوونی نوێنەری كەمایەتی و ئاینە جیاوازەكان لە پەرلەمانی كوردستان خواستێكی ئێمەیە و لەڕابردووشدا داواكاری سەرۆك مام جلال بووە كە دەبێت ئەو كەمایەتیان نوێنەری ڕاستەقینەی خۆیان هەبێت لەپەرلەماندا، بەڵام لە ئێستادا تێبینیمان هەیە لەسەر ئەوەی كە شێوازی دانانی ئەو كورسیانە و نوێنەرایەتیكردنی كەمایەتییە نەتەوەكان دەبێت ڕێكبخرێنەوە.
ئاماژەی بەوەشكرد، ئێمە لە فراكسیۆنی یەكێتی بەڕوونی داوای ئەوەمان كردووە كە دەبێت یاسی هەڵبژاردن هەموار بكرێتەوە و فرەبازنەیی لە هەرێمی كوردستان جێبەجێبكرێت، هاوكات لەبارەی كورسی كۆتاكانیش پێمان وایە كە دەبێت ئەو كورسیانە لەسەر ئاستی پارێزگاكان دابەشبكرێن و ناكرێت سەرجەمیان لە یەك پارێزگا چڕبكرێنەوە.
وتەكانی سەرۆكی فراكسیۆنی یەكێتی لەكاتێكدایە كە ئەمڕۆ سەعدی ئەحمەد پیرە ئەندامی مەكتەبی سیاسی یەكێتی ئەوەی ڕاگەیاند كە پێش دەستكردن بە هەڵبژاردن پارتی 11 كورسی بۆ یەكلایی بووەتەوە.
