لەبارەی بەردەوامی دابەشكردنی بەشەخۆراك دڵنیایی دەدرێتە هاووڵاتیان

SNN-عەلی حەمەسەعید

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئاماژە بەوە دەكات پرۆسەی دابەشكردنی بەشەئارد و خۆراكی هاووڵاتیان بەردوامی هەیەو دڵنیایی دەدەینە هاووڵاتیان كە تاكۆتایی ئەمساڵ بڕی پارەی پێویست دابینكراوە بۆ كڕینی بەشەخۆراكی هاووڵاتیان، هاوكات بۆ ماوەی ساڵێك پێویستیمان بە 750 هەزار تۆن گەنم دەبێت، لەمساڵدا بڕی زیاد لە 320 هەزار تۆن گەنممان لە جوتیارانی هەرێم وەرگرتووە و ئەو بڕەگەنمەش بەشی پێنج مانگی بەشەئاردی هاووڵاتیان دەكات.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: پرۆسەی دابەشكردنی بەشەئاردی هاووڵاتیان بەردەوامی هەیە و لە ئێستادا لەلایەن بریكارەكانی خۆراكەوە دەستكراوە بەدابەشكردنی بەشە ئاردی هاڵاووتیان، هاوكات ، ئەو گەنمەی ئەمساڵ لە جوتیارانی هەرێمی كوردستانمان وەرگرتووە سەرجەمی بۆ بەشە ئاردی پارێزگاكانی هەرێم كوردستان بەكار دێت.

ئاماژەی بەوەشكرد، ئەو گەنمەی ئەمساڵ لەجوتیارانی هەرێم وەرگیراوە بریتییە لە بڕی 322 هەزار تۆن گەنم، ئەو بڕەش بەشی پێنج مانگی بەشە ئاردی هاووڵاتیانی هەرێم دەكات هەروەها ساڵانە پێویستمان بە 750 هەزار تۆن گەنم هەیە بۆ 10 بەشە ئاردی هاووڵاتیانی پارێزگاكان هەرێم، هاوكات ئەو كورتهێنانەی‌ لە گەنم هەیە، حكوومەتی عێراق بۆخۆی پڕیدەكاتەوە.

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئەوەشی خستەڕوو، دڵنیایی دەدەینە هاووڵاتیان كە تاكۆتایی ئەمساڵ بڕی پارەی پێویست دابینكراوە بۆ كڕینی بەشەخۆراكی هاووڵاتیان، تائێستاش توانیومانە شەش بەشە خۆراك بەسەر هاووڵاتیاندا دابەش بكەین و سەرقاڵی دابەشكردنی حەوتەم بەشەخۆراكی هاووڵاتیانین.