پەرلەمانتارێكی عێراق: ئەوەی ڕوودەدات پیشهاتێكی مەترسیدارە و قەیرانەكان بەرو ئاڵۆزی زیاتر دەچن

SNN-عەلی حەمە سەعید
ئەندامێكی ئەنجومەنی نوێنەرانی عێراق ئاماژە بەوەدەكات ئەو دۆخەی لە عێراق دەگوزەرێت خەریكە دەگاتە بنبەست ئەوەش هێندەی دیكە مەترسی لەسەر ئایندەی دۆخی سیاسی لە عێراق دروستكردووە و مەترسی ڕاستەقینەش بۆ سەر دامودەزگا دەستوریەكانی عێراق دروست بوون، چونكە ڕۆژ لەدوای رۆژ قەیرانەكان زیاتر قوڵدەبنەوە.

دارا سێكانیانی، ئەندامی ئەنجومەنی نوێنەرانی عێراق لە فراكسیۆنی یەكگرتووی ئیسلامی بە SNNی ڕاگەیاند: ئەو دۆخەی لە عێراق دەگوزەێت سەرچاوەی لەوەوەگرتووە كە متمانە لە نێوان هێز و لایەنە سیاسییەكانی وڵاتەکە بەرو لاوازی و نەمان چووە، هەر ئەمەش وایكردووە كە كێشەوگرفتەكان ڕۆژانە زیاتر قوڵببنەوە لە نێوان لایەنە سیاسییەكان و دواجار گەیشتووینە دۆخێك كە پێشهاتێكی مەترسیدار چاوەڕێی عێراق دەكات.

ئاماژەی بەوەشكرد، هەر بەهۆی ئەو دۆخە سیاسییە ناسەقامیگرە ناڕوونەی كە لە عێراق دەگوزەرێت، مەترسی ڕاستەقینەش بۆ سەر دامودەزگا دەستوریەكانی عێراق و تەنانەش هاووڵاتیانی عێراقیش دروستبووە، بەو هیوایەی نەگاتە ئاستی پێكدادان و توندوتیژی، چونكە دواجار هەموولایەك دەبێت لەسەر مێزی گفتوگۆ كیشەو گرفتەكانیان چارسەر بكەن.

ئەو پەرلەمانتارە كوردەی ئەنجومەنی نوێنەرانی عێراق ئەوەشی خستەڕوو، هیوادارین كەلایەنە بەرپرسەكان بەوپەڕی دڵسۆزیەوە هەست بە مەترسییەكانی ئەم قۆناغە بكەن و گەلانی عێراق لەم قەیرانانە ڕزگاربكەن، چونكە هەرخودی ئەو لایەنە سیاسیانەن بوونەتە هۆی دروستبوونی ئەو كێشەو گرفتانەی ئێستا لە عێراق دەگوزەرێن، ئەگەریش ئەم دۆخە بەردەوامی هەبێت دواجار هەر خەڵكی عێراقە دەبێت باجەكەی بدەن.