لە سلێمانی لەدایکبوونی منداڵی دووانی و سیانی و چواری زیادی کردووە

SNN

دکتۆر پشدەر عەبدوڵا بەڕێوەبەری نەخۆشخانەی منداڵان، لە سلێمانی رایگەیاند: لەبەر ئەوەی لە ئێستادا بۆ چارەسەری منداڵ نەبوون ڕێگای بلووری بەکاردەهێنرێت و منداڵ لەدایک بوون بە بلووری زۆر بووە، بەشێک لەوانە سکەکانیان دوانی و سیانی و چوارین، زۆربەشیان منداڵەکانیان بە نەبەکامی لەدایک ئەبن.

دەشڵێت: زۆر بوونی لەدایک بوون بەبلووری و هیوا گەڕانەوە بۆ دایکان و باوکان و شادبوونیان بە منداڵی خۆیان جێگای خۆشحاڵییە، بەڵام لۆدێکی زۆریش لەسەر یەکەی منداڵە تازەلەدایکبووەکانمان درووست ئەکات، بەجۆرێک لە ئێستادا تەنها لەبەشی دووی یەکەی منداڵە تازە لەبووەکەمان نزیکەی چل منداڵی تێدایە کە هەژدە منداڵیان بەرهەمی تەنها شەش سکپڕین (واتە شەش سکی سیانی) و چواریشیان بەرهەمی دوو سکپڕین (واتە دوو سکی دوانی) کە سەرجەمیان نەبەکامن.

جێگای خۆشحاڵییە کە هاووڵاتیان متمانەیان بە نەخۆشخانەکەمان هەیە و تازە لەدایکبووەکەیان لای ئێمە چارەسەر ئەکەن، بەڵام کەمی کارمەند و پەرستار لەو دوو یەکەیەمان کێشەی گەورەی بۆ درووست کردووین و ناتوانین خزمەتێکی شایستە پێشکەش بکەین، بەهۆی نۆژەنکردنەوە و گەورەکردنی ئەو دوو یەکانەمان بووینەتە خاوەنی گەورەترین و پێشکەوتوترین یەکەی تازەلەدایکبوو لە عێڕاقدا، بەڵام بەدڵنیاییەوە بێ کەم و کورتی نین.

وتیشی “هیوادارین بەزووترین کات بەدەنگمانەوە بێن و هاوکارمان بن لە چارەسەرکردنی کێشەو کەمو کوورتیەکانمان.”