مسته‌فا كازمى و ئیبراهیم ڕه‌ئیسى له نیویۆك باسى چیان كردووه؟
كۆبوونه‌وه‌ى مسته‌فا كازمى، سه‌رۆكوه‌زیرانى عێراق و ئیبراهیم ڕه‌ئیسى، سه‌رۆككۆمارى ئێران | فۆتۆ: نووسینگه‌ى سه‌رۆكوه‌زیرانى عێراق
SNN
له په‌راوێزى به‌شداریكردن له كۆبوونه‌وه‌ى كۆمه‌ڵه‌ى نه‌ته‌وه یه‌كگرتووه‌كان مسته‌فا كازمى، سه‌رۆكوه‌زیرانى عێراق و ئیبراهیم ڕه‌ئیسى، سه‌رۆككۆمارى ئێران كۆبوونه‌وه.
نووسینگه‌ى مسته‌فا كازمى، سه‌رۆكوه‌زیرانى عێراق له به‌یاننامه‌یه‌كدا ناوه‌ڕۆكى كۆبوونه‌وه‌كه‌ى ئاشكرا كردووه و رایگه‌یاند، “سه‌رۆكوه‌زیرانى عێراق و سه‌رۆككۆمارى ئێران له كۆبوونه‌وه‌كانیاندا باسى په‌یوه‌ندییه دوو قۆڵییه‌كانى نێوان هه‌ردوو وڵات و پرسه ناوچه‌ییه‌كانیان كرد”.
له راگه‌یه‌نراوه‌كه‌دا له‌سه‌ر زارى ئیبراهیم ڕه‌ئیسى، سه‌رۆككۆمارى ئێران ئاماژه به‌وه‌كراوه، “ئێران پێیوایه عێراق رۆڵێكى گرنگى هه‌یه له پاراستنى سه‌قامگیرى و ئاسایشى ناوچه‌كه و پێویسته لایه‌نه سیاسییه‌كانى عێراقیش په‌نا بۆ دیالۆگ به‌رن له‌پێناو پاراستنى ئاسایشى ناوخۆى وڵات”.
باسكردن له گۆڕانى كه‌شوهه‌وا و ژینگه به‌شێكى ترى گفتوگۆكانى ئێران و عێراقى پێكهێناوه و به‌پێى راگه‌یه‌نراوه‌كه، “هه‌ردوولا كۆكبوون له‌سه‌ر ئه‌وه‌ى كه پێویسته وه‌ڵامدانه‌وه‌كانیان بۆ ئه‌م بابه‌ته خێراتر بكه‌ن و كارى هاوبه‌ش بكه‌ن له‌پێناو كه‌مكردنه‌وه‌ى كاریگه‌رییه‌كانى”.
پێكهێنانى حكومه‌تى نوێى عێراق به‌شێكى ترى گفتوگۆكانى كازمى و ڕه‌ئیسى بووه و له به‌یاننامه‌كه‌دا ئه‌وه‌شخراوه‌ته‌ڕوو، “ئیبراهیم ڕه‌ئیسى پشتیوانى خۆى پێكهێنانى حكومه‌تێكى نوێى به‌هێز نیشاندا و ستایشى ده‌ستپێشخه‌رییه‌كه‌ى سه‌رۆكوه‌زیرانى عێراقى كرد بۆ ده‌ستكردن به گفتوگۆكان له‌باره‌ى دۆخى سیاسى عێراق”.
