توركیا دەستی بە بۆردومانی پێنجوێن كردەوە و دەوامی چەند قوتابخانەیەك راگیرا
بۆردومانكردنى گوندێكى ههرێمى كوردستان لهلایهن سوپاى توركیاوه | فۆتۆ: Shaho Qandili
SNN – عەلی حەمەسەعید
بەڕێوەبەری ناحیەی ناڵپارێزی سەربە قەزای پێنجوێن رایدهگهیهنێت، ئەمڕۆ بۆ جارێكی دیكە فڕۆكە بێفڕۆكەوانهكانى توركیا هێرشیانكردووەتەوە سەر سنووری چەند گوندێكی ناحیەی ناڵپارێز، دهشڵێت: “لەپێناو سەلامەتی گیانی مامۆستایان و خوێندكارانیش بڕیارماندا بە راگرتنی دەوامی چەند قوتابخانەیەكی سنوورەكە”.
ئهمڕۆ پێنجشهممه 6ى تشرینى یهكهم، هێمن ئیبراهیم، بەڕێوەبەری ناحییەی ناڵپارێزی سەربە قەزای پێنجوێن بە SNNی راگەیاند، “كەمێك پێش ئێستا بۆ جارێكی دیكە فڕۆكەی بێفڕۆكەوانی توركیا هاتنە ئاسمانی سنوورەكەمان و دەستیان بە بۆردومانى سنووری گوندی (بادەنە) كردووە”.
لهبارهى زیانه گیانى و مادیهكانهوه بەڕێوەبەری ناحیەی ناڵپارێز ئاماژهى بهوهشكرد، “زیانى ماددى بهر ناوچهكه كهوتووه، بهڵام خۆشبهختانه تا ئێستا زیانى گیانى نییه”.
بەڕێوەبەری ناحییەی ناڵپارێز ئاماژەی بەوەشكرد، “بەهۆی ئەو هێرشانەوە و لە پێناو پاراستنی گیانی مامۆستایان و خوێندكاران بڕیارماندا بە راگرتنی دەوامی قوتابخانەی گوندەكانی، بادەنە، كانی ماران، دەرەمیانە و سوێرە پەیوەندیشمانكردووە بە خەڵكی گوندەكەوە خۆشبەختانە تا ئەم ساتە هیچ زیانێكی گیانی تۆمارنەكراوە”.
بەڕێوەبەری ناحییەی ناڵپارێز ئەوەشی خستەڕوو، “لەگەڵ ئەوەی لەم سنووری ئێمە هیچ بنكە و بارەگایەكی هێزێكی چەكداری بوونی نییە، بەڵام ماوەی سێ رۆژە بۆردومانی سنوورەكەمان دەكرێت، ئەوەش ترس و دڵەڕاوكێی لای گوندنشینانی سنوورەكە دروستكردووە”.
