وەزارەتی شارەوانی: پڕۆژەی ئاوەڕۆی سندووقی لە هەولێر جێبەجێدەکرێت

SNN

وەزارەتی شارەوانی و گەشتوگوزار رايگەياند: پرۆژەیەكی ئاوەڕۆ بە درێژایی هەزار و 200 مەتر لە سەنتەری شاری هەولێر دروست دەكرێت.

وەزارەتی شارەوانی و گەشتوگوزار لە راگەيەندراوێکدا بڵاويکردەوە: بە مەبەستی چارەسەركردنی گرفتی كۆبوونەوەی ئاوی باران و ئەگەری دروستبوونی لافاو لە شاری هەولێردا، پڕۆژەى ئاوەڕۆى سندووقى شەقامی 30 مەترى بۆ 60 مەتری بە گوژمەی نزیکەی دوو ملیار و 500 ملیۆن دینار جێبەجێ دەکرێت.

راشيگەياند: ئەو پرۆژەیە، پڕۆژەیەکى گەورەیە و بەڕێوەبەرایەتیی ئاو و ئاوەڕۆی هەولێری سەر بە وەزارەتی شارەوانی و گەشتوگوزار سەرپەرشتیی جێبەجێكردنی دەكات و ئێستاش بەشێكی پرۆژەكە لەسەر شەقامی 60مەتری تەواو كراوە و كاری بەشەكەى دیكەش لە شەقامى 30مەترى تەواو دەكرێت.

دەشڵێت “ئەم پرۆژەیە پێكهاتووە لە دروستكردنی ئاوەڕۆیەكی سندووقی بە درێژایی 1200مەتر لەسەر شەقامی 30 مەتری لە نزیك باڵەخانەی ئەنجوومەنی وەزیرانی هەرێمی كوردستانەوە تا شەقامی 60مەتری نزیك سایلۆ درێژ دەبێتەوە”.

ئاماژەی بەوەشکردووە: بە تەواوبووی كۆی بەشەكانی پرۆژەكە، گرفتی کۆبوونەوەی ئاوی باران لە شەقامی 30مەتری نامێنێت و گوشاریش لەسەر تۆڕەکانی ئاوەڕۆی سنوورەكە چارەسەر دەکات، هاوكات سیستەمی ئاوەڕۆی سەنتەری شاری هەولێر لەم زۆنەدا پێشوەچوونێكی زۆر باش بەخۆیەوە دەبینێت، جگە لەم پرۆژەیە ئێستا چەند پرۆژەیەكی دیكەی ئاوەڕۆ لە شاری هەولێر لە قۆناغی جێبەجێكردندان.