زانیاری لەسەر ئەو پردە نوێیەی لە دەربەندی ڕانیە دروست دەکرێت
دەربەندی رانییە فۆتۆ / محەمەد مستەفا
SNN- محەمەد مستەفا
ئەمڕۆ سێشەممە مەسرور بارزانی سەرۆکی حکومەتی هەرێم بەردی بناغەی دروستکردنی پردێکی نوێ بە تێچووی زیاتر لە 10 ملیار دینار لە دەربەندی ڕانیە دادەنێت.
عومەر حاجی وتەبێژی ئیدارەی راپەڕین بە SNNی راگەیاند: بڕیارە کاتژمێر 10ی پێش نیوەڕۆی ئەمڕۆ، مەسرور بارزانی بە یاوەری کۆمەڵێک وەزیر و وەفدی حکومی بگاتە ئیدارەی راپەڕین و لەدەربەندی ڕانیە بەردی بناغەی پردێکی نوێ دابنێت.
وتیشی ” تێچووی پڕۆژەکە بڕی 10 ملیار و 300 ملیۆن دینارە، ئەم پڕۆژەیە سودێکی گەورە بە ئیدارەی راپەڕین و سنووری قەزای دووکان دەگەیەنێت “.
باسی لەوەشکرد: پردی ئێستای دەربەندی ڕانیە پردێکی تۆکمە و سەلامەت نییە بە تایبەت بۆ هاتووچۆی ئۆتۆمبێلی بارهەڵگر، کە ئەمەش ببووە ئاستەنگێکی زۆر لەبەردەم دانیشتوانی ئیدارەی ڕاپەڕین و گوندەکانی سنووری قەزای دووکانیش.
