سەرۆکوەزیرانی ئیسرائیل: ناهێڵین بەرپرسانی ئێران بە ئاسودەیی لە تاران دابنیشن

SNN

سەرۆکوەزیرانی ئیسرائیل دەڵێت، وێڕای ئەوەی دەیانەوێت لەگەڵ کۆمەڵگای نێودەوڵەتی بە هاوبەشی بەرپەرچی هێرشەکەی ئێران بۆ سەر کەشتییەکی وڵاتەکەی لە دەریای عومان بدەنەوە، بەڵام بەتەنهاش خۆیان بۆ ئەو هەنگاوە ئامادە کردوە، دەشڵێت: چیتر ناهێڵن بەرپرسانی ئێرانی بە ئاسودەیی لە تاران دابنیشن.

نافتالی بێنێت، سەرۆکوەزیرانی ئیسرائیل رایگەیاند: لەهەوڵی دروستکردنی کۆدەنگی و هەنگاوی هاوبەشی نێودەوڵەتیدان بۆ وەڵامدانەوەی هێرشەکەی ئێران بۆ سەر کەشتی مێرسێر لە دەریای عومان، بەڵام تەلئەبیب بە تەنهاش باش دەزانێت کە چ هەنگاوێکی کرداری دەنێت”.

وتیشی: “ئەو سەردەمە بەسەرچوو کە بەرپرسانی تاران ئاگر لە رۆژهەڵاتی ناوەڕاست بەربدەن و خۆیشیان بە ئاسودەیی لە تاران دابنیشن”.

دوای ئەوەی رۆژی پێنج شەممەی رابردوو لە کەناراوەکانی دەریای عومان هێرشکرایە سەر کەشتییەکی ئیسرائیلی و بە هۆیەوە دوو کەس کوژران، هەر یەک لە ئیسرائیل، بەریتانیا و ئەمریکا رایانگەیاند، ئێران لە پشت هێرشەکەوەیە و پێویستە باجەکەی بدات و وەڵامی بدرێتەوە، لەبەرامبەردا بەرپرسانی تاران ئەو تۆمەتانە بە هەڵبەستراو و بێ بنەما ناودەبەن.