نەیزەکێک کەوتە ژووری نوستنی ماڵێکەوە
SNN
لە رۆژانی رابردوودا بەردێک دوای کونکردنی بانی ماڵێک لە نیوجێرسی ئەمریکا کەوتە ژووری نوستنی ئەو ماڵەوە و پاش لێکۆڵینەوە دەرکەوت کە بەردەکە نەیزەکە.
توێژەرانی کۆلێژی نیوجێرسی ئەمریکا رایانگەیاند، ئەو بەردەی لە رۆژانی رابردوودا لەناو ژووری نوستنی ماڵێکدا دۆزراوەتەوە، قەبارەکە 10 بە 15 سانتیمەترە و کێشی 970 گرامە.
باسیان لەوەشکردووە بۆیان دەرکەوتووە ئەو بەردە نەیزەکە لە جۆری دەگمەنی کۆندرەیتیە.
نیتان مێگی سەرۆکی بەشی فیزیای کۆلێژی نیوجێرسی باسی لەوەکردووە، مامۆستاکان و خوێندکارانی بەشەکەیان زۆر بەختەوەرن کە ئەو دەرفەتەیان بۆ هەڵکەوتووە لە نزیکەوە ئەو نەیزەکە دەگمەنە ببینن.
ئەندامانی ئەو خێزانەی لە ماڵەکەدا دەژین باسیان لەوەکردووە کە دوای ئەوەی دەنگێکی نامۆیان لە نهۆمی سەرەوەی ماڵەکەیان بیستووە، تەنێکی رەشیان هێندەی پەتاتەیەکی گەورە لە ناو ژووری نوستنەکەدا بینیوە کە بانەکەی کون کردووە و لەو کاتەدا کە دەستیان لێداوە گەرم بووە.
