“لە ساڵی داهاتووەوە هەر خێزانێک پسوڵەکەی نەکاتە ئەلیکترۆنی بەشە خۆراکەکەی دەبڕدرێت”

SNN-

بەڕێوەبەری پسوڵەی خۆراکی هەولێر ڕایگەیاند، بڕیارە ساڵی نوێ پرۆسەی بەئەلیکترۆنی کردنی پسوڵەی خۆراک لە هەولێر دەست پێبکات و پێویستیشە لەماوەی دیاریکراودا هاوڵاتیان سەردان بکەن و پسوڵەکەیان بە ئەلیکترۆنی بکەن ئەگەرنا بەشەخۆراکەکانیان دەبڕدرێت.

سیامەند قادر نانەکەلی، بەڕێوەبەری پسوڵەی خۆراکی هەولێر رایگەیاندووە، بڕیار بوو مانگی ئاب لە هەولێر پسووڵەی خۆراک بکرێتە ئەلیکترۆنی، بەڵام بەهۆی کێشەیەکی ئەلیکترۆنییەوە کارەکان ڕاگیران و نەتوانرا لە کاتی دیاریکراودا جێببەجێ بکرێت.

دەشڵێت:”تا ئێستا کارەکانی گۆڕینی پسوڵەتی خۆراک لە پێنج پارێزگای عێراق تەواو بوون ئەو پارێزگایانەش بریتین لە بەغدا، نەجەف، میسان، کەربەلا و دهۆک هەروەها حکومەتی عێراق لایەنی بەرپرسی لە هەرێم ئاگادار کردووەتەوە کە بڕیارە ساڵی نوێ پرۆسەی بەئەلیکترۆنیکردنی پسووڵەی خۆراک دەستپێبکات. پێشبینی دەکەین لە هەولێر بکەوێتە هاوینی 2024.

ئەوەش لەکاتێکدایە، 488 هەزار و 789 خێزان لە هەولێر پسووڵەی خۆراکیان هەیە و بۆ هەر پارێزگایەک دوو مانگ دیاری دەکرێت بۆ ئەوەی لەوماوەیەدا پسوڵەکانیان بە ئەلیکترۆنی بکەن.

هاوکات، هێشتا لە پارێزگای سلێمانی پڕۆسەکە دەستیپێنەکردووە و چاوەڕوانی حکومەتی عێراقن بۆ دیاریکردنی کاتی دەستپێکردنی پرۆسەکە.