شارەزایەکی کەشناسی: بارانی بە لێزمە و بەفر دەبارێت

SNN-

شارەزایەکی کەشناسی ئاشکرای دەکات، ئەمڕۆ و سبەینێ بارانی بەلێزمە و بەفر دەبارێت و پلەکانی گەرماش نزم دەبنەوە.

ئاراس جەبار، شارەزای کەشناسی بڵاویکردووەتەوە، لەکاتەکانی ئێوارەی ئەمڕۆ بۆ شەو بەھۆی درێژبوونەوەی کاریگەری نزمەپاڵەپەستۆی دەریای سوور بۆ سەر ناوچەکانمان ئاسمانی ھەرێم بەزۆری دەگۆرێت بۆ ھەوری تەواو و لەناوچەکانی رۆژئاوای عێراق و سنوری پارێزگای دھۆک و ئیدارەی زاخۆ لەکاتی جیاوازدا ئەگەری دروستبوونی ھەورە بروسکە و تاوە باران بەرێژەی جیاواز ئەبێت لەناوچەکانی دیکەدا ئەگەری نمە باران لەھەندێک کاتدا ئەبێت و کاریگەری ئەم ناسەقامگیرییە تا بەرەبەیانی سبەی سێشەمە 12/12/2023 بەردەوامی ئەبێت.

دەشڵێت:” بۆ سبەی ئاسمانی ھەرێم بەدرێژای کاتەکان ھەوری تەواو ئەبێت لەگەڵ ئەگەری نمە باران لەکات و شوێنی جیاوازدا و پلەکانی گەرما بەرێژەی 1 تا 2 پلە نزمبوونەوە بەخۆیەوە ئەبینێت و خێرای با لەسەرخۆ بۆ مامناوەند ئەبێت 5-15کم/ک لە ئاراستەی باکوری رۆژھەڵاتەوە”.

هەروەها، سبەی شەو کاریگەری نزمەپاڵەپەستۆکەی دەریای سوور لەسەر ناوچەکانمان چالاک ئەبێتەوە و بارانبارین لەزۆربەی ناوچەکان دەستپێدەکاتەوە بەرێژەی مامناوەند و رۆژی چوارشەمە 13/12/2023 چەقی کاریگەری ئەم شەپۆلە ئەبێت بەتایبەت لەسەر ناوچەکانی سنوری پارێزگای سلێمانی و ھەڵەبجە و ئیدارەی گەرمیان بە شێوەی بارانی بەردەوام و ھەندێک کات ھەورە بروسکە و لێزمە باران لەناوچەکانی دیکەشدا ئەگەری بارانی باش و مامناوەند ئەبێت ، لەگەڵ بارینی بەفر لەناوچە شاخاویە بەرزەکاندا و نزمبوونەوەی زیاتر لە پلەکانی گەرما.