وەزارەتی ناوخۆ بۆ شاخەوانەکان: بەبێ رەزامەندی ئاسایش نابێت کەسانی بیانی لەگەڵ خۆتان ببەن بۆ شاخەوانی

SNN-

وەزارەتی ناوخۆی حکومەتی هەرێم گروپە شاخەوانییەکان ئاگاداردەکاتەوە و دەڵێت:” لەپێناو رێکخستنی کاروباری شاخەوانی و پاراستنی ژینگە، نابێت لە هیچ چیایەکی کوردستان گروپە شاخەوانییەکان شوێنی مانەوەی جێگیر دابنێن، وەک دانانی کابینە و دروستکردنی خانو، هەروەها بەبێ رەزامەندی ئاسایش نابێت کەسانی بیانی لەگەڵ خۆیان ببەن و دەبێت نزیکی هیچ خاڵێکی ئەمنی نەکەونەوە”.

وەزارەتی ناوخۆ دەشڵێت:”چیای سەفین و چیاکانی سنووری سیدەکان و چیاکانی نیوان هەرێمی کوردستان و تورکیا و ئێران لەگەڵ ئەو چیایانەی تاوەکو ئێستا پاک نەکراونەتەوە لە مین، نابێت شاخەوانییان تێدا ئەنجام بدرێت”.

راشیگەیاندووە:”بە هیچ شێوەیەک نابێت کامێرای درۆن لەلایەن گروپە شاخەوانییەکانەوە بەکاربهێنرێت، هەروەها نابێت بە هیچ شێوەیەک هێما و نیشانە و جی پی ئێس لەو شوێنانەی شاخەوانی تێدا دەکرێن جێ بهێڵدرێن”.

ئاماژەی بەوەشکردووە، هەموو گروپە شاخەوانییەکان ئاگادار دەکرێنەوە لەوەی بەبێ رەزامەندی ئاسایش نابێت کەسانی بیانی لەگەڵ خۆیان ببەن و دەبێت نزیکی هیچ خاڵێکی ئەمنی نەکەونەوە.