ئەپیکور لەبارەی هەناردەکردنەوەی نەوتی هەرێمی کوردستانەوە راگەیەنراوێکی بڵاوکردەوە

SNN

کۆمەڵەى پیشەسازیى نەوتی هەرێمى کوردستان راگەیەنراوێکی بڵاوکردەوە و ئاشکرایکردووە، هیچ رێککەوتنێک لە نێوان حکومەتی عێراق و هەرێمی کوردستاندا نەکراوە، هاوکات راگرتنی نەوتی هەرێم مانگانە زیانێکی زۆر بە حکومەتی عێراق گەیاندووە.

ئەمڕۆ یەکشەممە 3ی ئازار، کۆمەڵەی پیشەسازیی نەوتی هەرێمی کورستان (ئەپیکور) راگەیەنراوێکی بڵاوکردووەتەوە و تیایدا هاتووە، “راگرتنی نەوتی هەرێمی کوردستان مانگانە یەک ملیار دۆلار زیان لە عێراق دەدات.

دەڵێت “هیچ رێککەوتنێک لەنێوان حکومەتی عێراق و حکومەتی هەرێمی کوردستان لەگەڵ کۆمپانیا نەوتییەکان بۆ هەناردەکردنەوەی نەوت نەکراوە، ئاماژە بەوەکراوە، هیچ پێشنیازێک لەلایەن هەردوو حکومەت هەرێمی کوردستان و عێراقەوە نەخراوەتەڕوو.

لەبارەی لێدوانی بەرپرسانی عێراق دەربارەی هەناردەکردنەوەی نەوتی هەرێمی کوردستان، روونیکردووەتەوە “لە نیازی لێدوانە بێ بنەماکانی بەرپرسانی عێراقی تێناگەین.”

گرووپی ئەپیکور لە شەش کۆمپانیای تایبەت بە نەوت لە هەرێمی کوردستان پێکهاتووە و پێش راگرتنی هەناردەکردنی نەوتی کوردستان بۆ تورکیا، ئەندامانی ئەو کۆمەڵەیە، 50٪ـی نەوتی رۆژانەی هەرێمی کوردستانیان بەرهەمدەهێنا، هاوکات رۆژی 25ـی ئازاری 2023، هەناردەکردنی نەوتی هەرێمی کوردستان لەسەر سکاڵای عێراق لەدژی تورکیا، بە بڕیارێکی دادگای ناوبژیوانیی نێودەوڵەتی لە پاریس راگیرا.