ئایا پارتی ڕێگری دەكات لە هەولێر و دهۆك هەڵبژاردن بكرێت؟

SNN-عەلی حەمە سەعید

ئەندامی ئەنجومەنی نوێنەرانی عێراق ئاماژە بەوەدەكات پارتی بڕیاری كۆتایی داوە بەشداری هەڵبژاردنێك ناكات كە لەلایەن دادگایەوە بە بڕیاری نادەستوری بەسەر هەرێمی كوردستانیدا سەپاندبێت و كورسی كۆتاكانی نەهێشتبێت، جەختیش دەكاتەوە تاكاتی هەڵبژاردن خواكەریمە پارتی ڕێگری بكات لە بەڕێوەچوونی هەڵبژاردن لەهەولێر و دهۆك یان نا.

شێروان دووبەردانی ئەندامی ئەنجومەنی نوێنەرانی عێراق لە فراكسیۆنی پارتی بە SNNی ڕاگەیاند: بڕیارەكەی پارتی دیموكراتی كوردستان بە بەشدارینەكردنی لە پرۆسەی هەڵبژاردنی پەرلەمانی كوردستان بەوردی دیراسەكراوە و بڕیارێكی دروستە، چونكە بە بەرپەرچدانەوەی ئەو بڕیاریانەیە كە دادگای فیدراڵی بە رامبەر بە هەرێمی كوردستان و پێكهاتەكان دەریكردوون.

ئاماژەی بەوەشكرد، پارتی لە خەمی پێكهاتەكانی هەرێمی كوردستاندایە و نیگەرانە لەوەی كە دادگای فیدراڵی بڕیاری نەهیشتنی 11 كورسی پێكهاتەكانی لە پەرلەمان دەركردووە، بۆیە بڕیارەكەی پارتی بڕیاری كۆتاییە و بەشداری هەڵبژاردنێك ناكەین كە بە بڕیاری نادەستووری بەسەر هەرێمی كوردستاندا سەپێندرابێت.

ئەو ئەندامەی ئەنجومەنی نوێنەرانی عێراق لە فراكسیۆنی پارتی ئەوەشی خستەڕوو، پیناچێت هەڵبژاردنی پەرلەمانی كوردستان لەوادەی دیاریكراوی خۆیدا بەڕێوەبچێت، لە حاڵەتێكیشدا ئەگەر بەڕیوەبچێت ئەوا “خوا كەریمە لەوەی پارتی ڕێگری بكات لە ئەنجامدانی هەڵبژاردن لە هەولێر و دهۆك یان نا”.