“لە سبەینێوە دەستدەكرێت بە تۆماركردنی ناوی چاودێرانی سەر سندوقەکانی دەنگدان”
کارمەندی کۆمسیۆن
SNN-عەلی حەمە سەعید
بەرپرسی ئۆفیسی سلێمانی كۆمیسیۆنی باڵای سەر بەخۆی هەڵبژاردنەكانی عێراق ئاماژە بەوە دەكات لە سبەینێ پینجشەممەوە دەستدەكرێت بە تۆماركردنی ناوی ئەو كەسانەی كە خوازیارن ببنە چاودێر بۆسەر سندوقەكانی هەڵبژاردنی پەرلەمانی كوردستان، بۆ ئەومەبەستەش چەند مەرجێك دیاریكراوە.
ئامانج عەزیز، بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: بەگوێرەی ئەو خشتەی كارەی دانراوە بۆ جێبەجێكردنی كارەكانی كۆمیسیۆن، لە سبەینێ پێنجشەممە 4/4/2024 ەوە دەستدەكرێت بە تۆماكردنی ناوی ئەو كەسانەی كە خوازیارن ببنە چاودێری سەر سندوقەكانی هەڵبژاردنی پەرلەمانی كوردستان.
ئاماژەی بەوەشكرد، ئەو كەسانەی كە خوازیارین ببنە چاودێر مەرجە لە هیچ داموودەزگایەكی ئەمنی دانەمەزرابن، هاوكات سەرجەم فەرمانبەرانی داموودەزگا حكومییەكان مافی ئەوەیان هەیە فۆڕم پڕبكەنەوە بۆ چاودیری سەر سندوقەكان بۆ ڕۆژی هەڵبژاردن كە وابڕیارە لە 10/6/2024 بەڕێوەبچێت و پركردنەوەی فۆڕمیش بەشێوەی ئەلیكترۆنی دەبێت و دواتر تا بەرواری 20/4/2024 پركردنەوەی فۆڕم بەردەوامی دەبیت و پاشان تیروپشك بۆناوەكان دەكرێت.
ئەو بەرپرسەی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، خوێندكارانی زانكۆ و پەیمانگاكان و هەروەها دەرچووانی زانكۆو پەیمانگاكانیش مافی پڕكردنەوەی فۆڕمی چاودێرییان هەیە بەڵام بەمەرجێك بڕوانامەی خوار دبلۆمیان نەبێت واتە دەرچووانی پۆلی 12ی ئامادەیی مافی پڕكردنەوەی فۆڕمەكەیان نابێت.
لینکی پڕکردنەوەی فۆڕمی کۆسمیۆن کە 4ی 4 دەستبەکار دەبێت
