نوێترین زانیاریی لەبارەی رووداوی هاتوچۆکەی سەر رێگەی دوکان _ سلێمانی

SNN

هاتووچۆی سلێمانی زانیاری لەبارەی رووداوەكەی ئەمڕۆی بەردەم بازگەی دوكان بڵاوکردەوە و رایگەیاند، بارهەڵگرێك بەهۆی لەدەستدانی كۆنترۆڵەوە خۆی بە 15 ئۆتۆمبێلیدا كێشاوە و چەندین كەسیش بریندار بوون.

نیوەڕۆی ئەمڕۆ هەینی 26ی نیسان، لەسەر رێگای دوكان – سلێمانی، نزیك بازگەی دوكان، رووداوێكی هاتووچۆ لەنێوان بارهەڵگرێك و ژمارەیەك ئۆتۆمبیلدا روویداو بەهۆیەوە ژمارەیەك هاوڵاتی بریندار بوون.

رائیدی هاتووچۆ بەهمەن عەبدوڵڵا، وتەبێژی بەڕێوەبەرایەتی هاتووچۆی پارێزگای سلێمانی لەبارەی رووداوەکەوە رایگەیاند، رووداوەكە لە ئەنجامی لەدەستدانی كۆنتڕۆڵی ئۆتۆمبێلێكی بارهەڵگر بووە لە جۆری فلات كە كۆنتێنەری لەسەر بووە لە سلێمانییەوە بە ئاڕاستەی دوكان رۆیشتووە، پێش گەیشتنی بە بازگەكە كۆنتڕۆڵ لەدەست دەدات و خۆی دەكێشێ بە دوو ئۆتۆمبێلدا، پاشان بە ئاڕاستەی بازگەكە دەڕوات و لەناو بازگەكە خۆی بە 13 ئۆتۆمبێلی تردا دەكێشێت.

وتەبێژی هاتووچۆی سلێمانی ئاماژەی بەوەكردووە، شۆفێری بارهەڵگرەكە بەڕەگەز عەرەبە و خەڵكی شاری بەغدایە، لەئەنجامی رووداوەكەش 15 كەس بریندار بوون، بەڵام هیچ كەسێك گیانی لەدەست نەداوە.