زانیاری نوێ لە بارەی گیانلەدەستدانی چوار شاخەوان لە قەرەداغ رادەگەیەندرێت

رۆژیار سیروان- SNN

ئەمڕۆ بەهۆی لافاوەوە لە قەرەداغ چوار شاخەوان گیانیان لەدەستدا، بەپێی زانیارییەکان، دوای ئەوەی لافاوەکە یەکێک لە ئەندامانی تیمەکەی بردووە، سێ ئەندامی دیکەی تیمە شاخەوانییەکان هەوڵیانداوە رزگاری بکەن، بەڵام ئەوانیش گیانیان لەدەستداوە.

لەوبارەوە یاسر حەمە ساڵح ئەندامی تیمی فریاگوزاری سەرەتایی تۆری شاخەوانی کوردستان بە SNNی راگەیاند: ئەو تیمە 12 کەس بوون، لە دەربەند مەسورانی قەرەداغدابوون، کە لافاوەکە هاتووە، یەکێکیان کەوتووەتە ناو لافاوەکەوە، سێ ئەندامی دیکەی تیمەکە هەوڵیانداوە رزگاری بکەن، بەڵام ئەوانیش گیانیان لەدەستداوە.

ئەوەشی خستەڕوو، هەر چوار شاخەوانەکە لە رەگەزی نێرن، تەمەنیان لە نێوان 23 بۆ 40 ساڵدایە.

باسی لەوەشکرد، هەشت ئەندامەکەی دیکەی گروپەکە بۆ لێکۆڵینەوە راگیراون.