“پرۆسەی دابەشکردنی زەوی بەسەر فەرمانبەران خێراتر دەکرێت”
دابەشکردنی زەوی
SNN
وەزیری شارەوانی و گەشتوگوزار دەڵێت، پەلەدەکەن لە کارەکانی پرۆسەی دابەشکردنی زەوی و ئەگەر پێویست بکات ماستەرپلانی شارەوانییەکانیش فراوان دەکەن.
ساسان عەونی، وەزیری شارەوانی و گەشتوگوزار، جەختی لەسەر پەلەكردن لە پرۆسەی دابەشکردنی زەوی کردووەتەوە و داوای کردووە تا هەفتەی داهاتوو سەرجەم شارەوانییەكان ڕاپۆرتێكی تەواو و تێروتەسەل ئامادە بكەن و تێیدا ژمارەی فەرمانبەران و شوێنی دابینكردنی زەوی لەسەر نەخشەدا دیاری بكرێت.
وەزیری شارەوانی راشیگەیاندووە: ئەگەر زەوی لە سنووری ماستەرپلاندا بەردەست نەبوو، بۆ ئەوەی زۆرترین ژمارەی فەرمانبەران لە وەرگرتنی زەوی سوودمەند ببن، پێویستە ماستەرپلانی شارەوانییەکان فراوان بکرێت و زەوی دابین بکەن.
دوای نزیکەی 18 ساڵ لە راگرتنی دابەشکردنی زەوی، حکومەتی هەرێم لەمساڵدا بڕیاریدا دەست بەدابەشکردنی زەوی بکرێتەوە، لە سەرەتای مانگی نیسانیشەوە دەست بە گرتنەبەری رێکار و ئامادەکارییەکانی جێبەجێکردنی بڕیارەکە کراوە.
