گەڕی دووەمی هەڵبژاردنی پەرلەمانی ئێران بەڕێوەدەچێت

SNN

ئەمڕۆ گەڕی دووەمی دەنگدانی هەڵبژاردنی پەرلەمانی ئێران بەڕێوەدەچێت و چارەنووسی 45 کورسی یەکلایی دەکرێتەوە، کە لە گەڕی یەکەمدا یەکلانەکرابوونەوە و چەند کورسییەکیشیان بۆ شارەکانی رۆژهەڵاتی کوردستانە.

دەستەی هەڵبژاردنەکانی ئێران بڵاویکردەوە، ئەمرۆ له‌ گه‌ڕی دووه‌می هه‌ڵبژاردنی په‌رله‌مان، لە 15 پارێزگا و 22 بازنەی هەڵبژاردن چاره‌نووسی 45 كورسی یه‌كلاده‌كرێته‌وه‌ كه‌ له‌ گه‌ڕی یه‌كه‌مدا به‌هۆی ئه‌وه‌ی هیچكام له‌ كاندیده‌كان نەیانتوانیبوو پێویست بەدەستبهێنن.

رۆژی 1ی ئاداری ئه‌مساڵ گه‌ڕی یه‌كه‌می هه‌ڵبژاردن له‌ئێران ئه‌نجامدرا وله‌ كۆی 290 كورسیی په‌رله‌مانی ئێران، چاره‌نوسی 245 كورسی له‌ گه‌ڕی یه‌كه‌مدا یه‌كلایی بوونه‌وە‌ و چاره‌نوسی 45 كورسی دیكه‌ش کەوتە گه‌ڕی دووەمەوە.

وردەکاری ئەو کورسیانەی یەکلانەکراونەتەوە بەم جۆرەیە: له‌ ئازه‌ربایجانی رۆژهه‌ڵات (ته‌ورێز)، شه‌ش كورسی، له‌ ئه‌سفه‌هان یه‌ك كورسی، له‌ ئه‌لبورز یه‌ك كورسی، له‌ خوراسانی ره‌زه‌وی؛ 2 كورسی، له‌ خوراسانی باشور یه‌ك كورسی، له‌ خوزستان سێ كورسی، له‌ زه‌نجان دو كورسی، له‌ فارس پێنج كورسی، له‌ كرماشان دو كورسی، لوڕستان دو كورسی، له‌ گوڵستان یه‌ك كورسی، له‌ مازه‌نده‌ران دو كورسی، له‌ هه‌مه‌دان یه‌ك كورسی، کە 90 کاندید کێبڕکێ دەکەن لەسەر بردنەوەی ئەو کورسیانە.

لە هەڵبژاردنی پەرلەمانی ئێراندا زیاتر لە 61 ملیۆن دەنگدەر مافی دەنگدانیان هەبوو، 15 هەزار و 200 کەس خۆیان بۆ پەرلەمان کاندید کردبوو.

رێژەی بەشداری لەو هەڵبژاردنە 41٪بوو ئەمەش بەراورد لەگەڵ هەڵبژاردنەکانی دیکەی ئەو وڵاتە زۆر کەمتر بوو.