ئهمریكا لهسهر هێرشكردنهسهر كۆمپانیا ئهمریكیهكان له بهغدا هاتهدهنگ
ماتیو میلهر، وتهبێژى وهزارهتى دهرهوهى ئهمریكا | فۆتۆ: AP
SNN
وتهبێژى وهزارهتى دهرهوهى ئهمریكا رایدهگهیهنێت، هێزهكانى حهشدى شهعبى به گوێى فهرماندهى گشتى هێزه چهكدارهكانى عێراق ناكهن و دهشڵێت: “نیگهرانین لهوهى له دهرهوهى دهسهڵاتى سهرۆكوهزیرانى عێراق كاردهكهن”.
ماوهى زیاتر له دوو ههفتهیه بهشێك له كۆمپانیا ئهمریكیهكان و براندهكانى ئهو وڵاته له بهغدا دهبنه ئامانجى گروپه چهكدارییهكان، بۆ نمونه لهماوهى حهوت رۆژدا دوو جار به بۆمب و رومانه هێرشكراوهتهسهر یهكێك له لقهكانى خواردنگهى (KFC) له شهقامى فهلهستین كه یهكێكه له برانده ئهمریكیهكان.
ئهمڕۆ ههینى 7ى حوزهیران، ماتیۆ میلهر، وتهبێژى وهزارهتى دهرهوهى ئهمریكا له كۆنگرهى رۆژنامهوانى ئاسایی خۆیدا لهبارهى بابهتى هێرشكردنهسهر كۆمپانیا و برانده ئهمریكیهكان له عێراق وتى: “نیگهرانین لهوهى كه چهكدارهكانى حهشدى شهعبى له دهرهوهى فهرمانى محهمهد شیاع سودانى سهرۆكوهزیرانى عێراق و فهرماندهى گشتى هێزه چهكدارهكانى عێراق كاردهكهن و گوێڕایهڵى نابن”.
وتیشى: “ئهو چهكدارانه بهشدارن لهو ناسهقامگیرییهى كه له عێراق و سوریا ههیه”.
به وتهى وتهبێژى وهزارهتى دهرهوهى ئهمریكا، “هێرشكردنهسهر هێزهكانى ئهمریكا و هێزهكانى هاوپهیمانان و شوێنه بازرگانیهكان زیان به سهروهرى خاكى عێراق و ئابوورییهكهشى دهگهیهنێت”.
له بهشێكى ترى قسهكانیدا ماتیو میلهر باسى لهوهشكرد، “بهردهوامدهبین له داواكارییهكانمان له حكومهتى عێراق بۆ ئهوهى ئهو لایهنانه بخاتهژێر چهترى خۆى و ئهو كهسانهشى كه بهرپرسن له هێرشهكان و سهرپێچى یاسا دهكهن رووبهڕووى سزا بكاتهوه”.
