“هیچ دانیشتنێكى نائاسایی بۆ هه‌ڵبژاردنى سه‌رۆكى په‌رله‌مان ناكرێت”
خولى پێنجه‌مى ئه‌نجوومه‌نى نوێنه‌رانى عێراق | فۆتۆ: راگه‌یاندنى په‌رله‌مانى عێراق
SNN
سه‌رۆكى لیژنه‌ى یاسایی له ئه‌نجوومه‌نى نوێنه‌رانى عێراق به دوورى ده‌زانێت هیچ دانیشتنێكى نائاسایی بۆ هه‌ڵبژاردنى سه‌رۆكى په‌رله‌مانى عێراق ئه‌نجام بدرێت و ده‌ڵێت: ئه‌ندامانى ئه‌نجوومه‌نى نوێنه‌ران له پشوودان.
ئه‌مڕۆ سێشه‌ممه 18ى حوزه‌یران، رێبوار هادى، سه‌رۆكى لیژنه‌ى یاسایی له ئه‌نجوومه‌نى نوێنه‌رانى عێراق رایگه‌یاند، “هیچ پلانێك نییه بۆ ئه‌وه‌ى كۆبوونه‌وه‌ى نائاسایی ئه‌نجامبدرێت بۆ هه‌ڵبژاردنى سه‌رۆكى ئه‌نجوومه‌نى نوێنه‌ران له‌دواى جه‌ژن”.
وتیشى: “ئێستا ئه‌ندامانى ئه‌نجوومه‌نى نوێنه‌رانى عێراق له پشووى خۆیاندان و په‌رله‌مانیش له پشووى یاسادانانى خۆیدایه”.
به وته‌ى سه‌رۆكى لیژنه‌ى یاسایی، “تاوه‌كو ئێستا هیچ كۆده‌نگیه‌كى سیاسى نییه له‌سه‌ر هه‌ڵبژاردنى سه‌رۆكى نوێى په‌رله‌مانى عێراق”.
رۆژى 14ى تشرینى دووه‌مى 2023، دادگاى فیدراڵى عێراق له‌سه‌ر سكاڵاى له‌یس دلێمى، ئه‌ندامى پێشووى ئه‌نجوومه‌نى نوێنه‌رانى عێراق به‌تاوانى ساخته‌كردنى نووسراوى ده‌ستله‌كاركێشانه‌وه، ئه‌ندامیه‌تى محه‌مه‌د حه‌لبوسى، سه‌رۆكى په‌رله‌مانى عێراقى هه‌ڵوه‌شانده‌وه و له پۆسته‌كه‌ى دووریخسته‌وه. پاش تێپه‌ڕینى زیاتر حه‌وت مانگ هێشتا ئه‌و پۆسته پڕنه‌كراوه‌ته‌وه.
