لە چوار رۆژی جەژندا حاڵەتەکانی ئاگرکەوتنەوە گەیشتبووە 348 حاڵەت
SNN
سەدان دۆنم لە پوش و پاوان و دارستانی سروشتی لە سنووری پارێزگاکانی هەرێم سووتاون و تەنیا لە رۆژانی جەژنی قورباندا 348 حاڵەتی ئاگرکەوتنەوە تۆمار کراون.
بەرگری شارستانی هەرێم لە راگەیەندراوێکدا ئاشکرایدەکات لە رۆژانی جەژن دا: “لە کۆی (404) رووداو، (348) رووداویان ئاگرکەوتنەوەی پوش و پەلاش بووە کە زیانی زۆری بە هاووڵاتیان گەیاندووە”.
سەرچاوەیەک لە پۆلیسی سنوور و دارستان بە ماڵپەڕی فەرمی یەکێتی راگەیاند، بەشێکی زۆری ئاگرکەوتنەوەکان بەهۆکاری خەمساردی هاووڵاتیانەوەیە کە دەچنە سەیران و گەشت، ئاگردەکەنەوە”
هاوکات رەشەبا هۆکارێکی تەشەنەسەندنی ئاگری پوش و پاوان و دارستانە، کە بەئاسانی کۆنترۆڵ ناکرێن و زیانێکی زۆر بە دارستان و ژینگەی کوردستان دەگەیەنێت، لەهەمان کاتدا لەسنووری پارێزگای دهۆک هۆکاری سەرەکی ئاگرکەوتنەوەی دارستان و پاوان بۆردومانی تورکیایە.
