ئەرمینیا دەوڵەتی فەلەستینی بە فەرمی دەناسێت
SNN
ئەرمینا بە فەرمی ناسینی دەوڵەتی فەلەستینی راگەیاند و بەمەش ژمارەی ئەو وڵاتانەی تائێستا دانیان بەو دەوەڵەتەدا ناوە بەرزبووەوە بۆ 147 وڵات.
ئەمرۆ هەینی وەزارەتی دەرەوەی ئەرمینیا رایگەیاند، پاڵپشت بە یاسا نێودەوڵەتیەکان و بە جەختکردنەوە لە بنەمای یەکسانی، سەروەرت و پێکەوەژیانی ئاشتیان دان بە دەوڵەتی فەلەستینیدا دەنێن.
لە راگەیەندراوەکەدا هاتووە، ئەرمینیا بەردەوام پێی وابووە کە رێگە چارەی ئاشتیانە و هەمەلایەنە بۆ کێشەی فەلستین بنەمای هەبوونی دوو دەوڵەتی سەربەخۆی فەلەستینی و ئیسرائیلیە.
بڕیارەکەی ئەرمینیا کاردانەوەی جیاوازی بەدوادا هات، دەسەڵاتداری فەلەستینی پێشوازی لێکرد و ئیسرائیلیش وەک ناڕەزایەتی ئارمەن هاکوپیا باڵیۆزی ئەرمینیا لە تەلئەبیبی بانگهێشت و بە توندی ناڕەزایەتی وڵاتەکەی پێگەیاند.
لە ماوەی دوومانگی رابردوودا چەند وڵاتێک لەوانە نەرویژ، ئیرلەندا و ئیسپانیا دانیان بە دەوڵەتی فەلەستینیدا ناوە و دوابەدوای بڕیارەکەی ئەرمینیاش ژمارەی ئەو وڵاتانەی دانیان بەو دەوڵەتەدا ناوە گەیشتە 147 وڵات.
بەهۆی پاڵپشتیەکانی ئیسرائیل لە ئازەربایجان، پەیوەندییەکانی تەلئەبیب و یەریڤان لە چەند ساڵی رابردوودا گرژی تێکەوتووە و میدیاکانی ئیسرائیل هۆکاری بڕیارەکەی ئەرمینیا بۆ دانپێدانان بە دەوڵەتی فەلەستینی بۆ ئەو گرژیانە دەگێڕنەوە، ئەمە جیالەوەی ئەرمینیا پەیوەندییەکی نزیکی لەگەڵ کۆماری ئیسلامی ئێران هەیە و ئەندامی چاودێریشە لە کۆمکاری عەرەبیدا.
