دادگای فیدراڵی لەسەر سکاڵایەکی سودانی کۆدەبێتەوە

SNN

ئەمڕۆ دادگای فیدراڵی لەسەر سکاڵایەک کۆدەبێتەوە، لە لایەن محەمەد شیاع سودانی سەرۆکوەزیرانی عێراقەوە لەسەر ماددەیەکی یاسای بودجە تۆمارکراوە.
ئەمڕۆ دووشەممە 24ی حوزەیران، بەگوێرەی خشتەی دانیشتنەکانی دادگای فیدراڵی، ئەمڕۆ کۆدەبێتەوە و یەکێک لە بڕگەکانی کۆبوونەوەکە تایبەت دەبێت بە سکاڵایەکی محەمەد شیاع سودانی، سەرۆکوەزیرانی عێراق، کە سکاڵای لەسەر سەرۆکی دورخراوەی ئەنجوومەنی نوێنەرانی عێراق تۆمارکردووە.

هاوکات لە سکاڵاکەدا، داوای کردووە ماددەی 71ی یاسای بودجەی گشتی بۆ ساڵەکانی 2023 و 2024 و 2025 بە نادەستوریی لەقەڵەم بدرێت، کە ئەو ماددەیە حکومەتی عێراقی پابەند کردبوو بەوەی تا ڕۆژی 30ی تشرینی دووەمی 2023 کۆتایی بە کاری بە وەکالەتی سەرجەم بەڕێوەبەرەکان بھێنێت و پۆستەکان بە وەکالەت بەڕێوەنەبرێت.

لە سکاڵاکەدا سودانی داوایکردووە، دەرماڵەکانی دەسەڵاتە کارگێڕییەکان ڕابگیرێت، ئەمەش لە کاتێکدایە دوای تێپەڕبوونی چەندین مانگ، ھێشتا ئەو دەرماڵانە ڕانەگیراون.