لە دوو رووداوی ئاگرکەوتنەوەدا نزیکەی 70 دۆنم پوش و پاوان سوتاون

SNN

لە قەزای دوکان بەهۆی ئاگرکەوتنەوە نزیکەی 10 دۆنم پوش و پاوان سوتاوە و هاوکات لە رووداوێکی تری هاوشێوەدا لە مێرگەپان زیاتر لە 60 دۆنم پوش و پاوان سوتاوە.

ئەمڕۆ شەممە 29ی حوزەیران، بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند، بەهۆی کەوتنەوەی ئاگرێکی بەرفراوان لەقەزای دوکان لە ( غاباتی دار سنەوبەرەکان )، نزیکەی ( 10 ) دۆنم پوش و پاوان سوتان و زیاتر لە ( 60 ) دار سنۆبەر زیانیان پێ گەیشتووە و بەشێکیشیان سووتاون.

ئاماژە بەوەکراوە، کارمەندانی بەشی پۆلیسی دارستانی دوکان بەهاوکاری لایەنە پەیوەندیدارەکانی سنورەکە ئاگرەکەیان کۆنتڕۆڵ کرد، هۆکاری ئاگرەکەش گومان دەکرێت لەدەست کەوتبێتەوە بەدواداچوون و لێکۆڵینەوەی وورد بەردەوامە بۆ دۆزینەوەی کەسی سەرپێچیکار، پەڕاوی لێکۆڵینەوەی بۆ ڕێکخراوە و ڕادەستی دادوەر کراوە بۆ وەرگرتنی ڕێکاری یاسایی .

لە رووداوێکی تری هاوشێوەدا، ئاگرێکی بەرفراوان لە مێرگەپان کەوتەوە و مەفرەزەیەک لە بنکەی پۆلیسی دارستانی مێرگەپان  گەیشتنە شوێنی ڕووداوەکە بەمەبەستی کوژاندنەوەی ئاگرەکە ، لەئەنجامدا بەهاوکاری پۆلیسی ئاگر کوژێنەوەی سورداش و هاوڵاتیانی دانیشتوی مێرگەپان توانیان دوای دوو کاتژمێر ئاگرەکە کۆنترۆڵ بکەن.

ئەوەشخراوەتە ڕوو، بەهۆی ئاگرەکەوە  نزیکەی( 60 ) دۆنم پووش و پاوان و داری سروشتی هەمەجۆر و یەک کابینەی هاووڵاتییەك سوتاوە، هۆکاری ئاگرەکە نەزانراوە و لێکۆڵینەوە و بەدواداچوون بەردەوامە .