ئەمڕۆ نێچیرڤان بارزانی لەگەڵ سەرۆكکۆماری نەمسا كۆدەبێتەوە
نێچیرڤان بارزانى، سهرۆكى ههرێم | فۆتۆ: SNN
SNN
دوێنێ دووشەممە، سەرۆكی هەرێمی كوردستان بە فەرمی سەردانی ڤیەننای پایتەختی نەمسای کرد و وابڕیارە ئەمڕۆ لەگەڵ سەرۆككۆمار و وەزیری دەرەوەی ئەو وڵاتە كۆببێتەوە.
ڕۆژی دووشەممە 1ی تەمموز، نێچیرڤان بارزانی سەرۆكی هەرێمی كوردستان گەیشت ڤیەننای پایتەختی نەمسا و لەلایەن لێپرسراوانی باڵای ئەو وڵاتەوە پێشوازی لێكرا.
سەرۆكایەتی هەرێمی كوردستان لە راگەیەندراوێكدا ئاماژەی بەوەكردووە، بڕیارە ئەمڕۆ یەكەم كۆبوونەوەی سەرۆكی هەرێم لەگەڵ ئەلێكساندەر شالمبێرگ وەزیری دەرەوەی نەمسا دەبێت و هەریەك لە فەوزی هەریری سەرۆكی دیوانی سەرۆكایەتی هەرێم و فەلاح مستەفا راوێژكاری باڵای سەرۆكایەتی هەرێم و مستەفا رەمەزان نوێنەری حكومەتی هەرێمی كوردستان و باڵیۆزی عێراق لە ڤیەننا یاوەری نێچیرڤان بارزانی دەكەن.
ئاشکرایکردووە، كۆبوونەوەی دووەمی سەرۆكی هەرێم لە كۆشكی سەرۆكایەتیی نەمسایە و لەوێ لەگەڵ ئەلێكساندەر فەندەبێلنی سەرۆكی نەمسا كۆدەبێتەوە.
بەگوێرەی راگەیەنراوەکەی سەرۆکایەتی هەرێم، نێچیرڤان بارزانی لە كۆبوونەوەی لەگەڵ سەرۆككۆمار و وەزیری دەرەوەی نەمسا دەرفەت و بوارەكانی برەودان بە پەیوەندییەكانی نەمسا لەگەڵ عێراق و هەرێمی كوردستان و فراوانكردنی هاریكاریی هاوبەش، تاوتوێدەكات.
