کۆمیسیۆن: نزیکەی سێ ملیۆن دەنگدەر لە هەرێمی کوردستان تۆمارکراون

کۆمیسیۆنی باڵای سەربەخۆی هەڵبژاردنەکانی عێراق رایگەیاند، نزیکەی سێ ملیۆن دەنگدەر لە هەرێمی کوردستان تۆمارکراون و کارتی دەنگدانیان وەرگرتووەتەوە و زۆرترین رێژەش لە پارێزگای سلێمانییە.

کۆمیسیۆنی باڵای سەربەخۆی هەڵبژاردنەکانی عێراق ئاماری تۆماری دەنگدەرانی بڵاوکردووەتەوە و دەڵێت، لە کۆی سێ ملیۆن و 789 هەزار و 360 دەنگدەری هەرێمی کوردستان، دوو ملیۆن و 901 هەزار و 80 دەنگدەر تۆمارکراون و کارتی دەنگدانیان وەرگرتووەتەوە.

لە ئامارەکەی کۆمسیۆندا هاتووە لە پارێزگای هەولێر لە کۆی ملیۆنێک و 366 هەزار و 462 دەنگدەر، ملیۆنێک و 16 هەزار و 357 دەنگدەر تۆمارکراون، لە پارێزگای سلێمانی لە کۆی ملیۆنێک و 496 هەزار و 152 دەنگدەر، ملیۆنێک و 146 هەزار و 530 دەنگدەر تۆمارکراون و لە دهۆکیش لە کۆی 926 هەزار و 746 دەنگدەر، 738 هەزار و 193 دەنگدەر تۆمارکراون.

رۆژى 28ـى حوزەیران نێچیرڤان بارزانی، سەرۆکى هەرێمى کوردستان رۆژى 20ـى 10ـى 2024ـی بۆ هەڵبژاردنى پەرلەمانى کوردستان دیاریکرد.