ئەو گرفتانەی ئێستا لە لیستی مووچەدا هەن كەمترنین لەو گرفتانەی پێشتر لە نێوان هەولێر و بەغدا هەبوون

SNN-عەلی حەمە سەعید

مانگانە لەگەڵ ناردنی لیستی مووچەی فەرمانبەرانی هەرێم بۆ بەغدا، ژمارەی میلاكی فەرمانبەرانی هەرێم زیاد دەكات لە وەزارەتە جیاوازەكان، ئەمەش نیگەرانی وەزارەتی دارایی عێراقی لێكەوتووەتەوە بەرپرسیكی وەزارەتی دارایی و ئابوری حكومەتی هەرێمیش ئاماژە بەوەدەكات ئەو گرفتانەی ئێستا لە لیستی مووچەی فەرمانبەرانی هەرێم هەن هیچیان كەمتر نییە لەو گرفتانەی پێشتر لەنێوان هەولیر و بەغدا هەبوون.

بەگوێرەی ئەو زانیارییانەی كە لەبەرپرسێكی وەزارەتی دارایی و ئابووری حكومەتی هەرێم بە SNNدراون ئەوەخراوەتەڕوو، وەزارەتی دارایی عێراق بەتەواوی نیگەرانی خۆی دەربڕیوە لەبارەی ئەو هەموو گۆڕانكارییەی كە مانگانە لەگەڵ ناردنی لیستی مووچەی فەرمانبەرانی هەرێم ڕوودەدەن لە زیاد بوونی میلاكی فەرمانبەران، هەر ئەمەش وایكردووە كە وەزارەتی دارایی عێراق بە 10 ڕۆژ دوای دابەشكردنی مووچەی فەرمانبەرانی دیكەی عێراق بڕیار لەسەر ناردنی پارە بدات بۆ هەرێم.

ئاماژەی بەوەشكرد، بۆ مانگی حەوت وەزارەتی دارایی هەرێم لیستێكی رەوانە كردووە كە زۆر جیوازە لەو لیستەی بۆ مانگی شەش ڕەوانەی كردبوو، چ لەڕووی زۆر بوونی ژمارەی میلاكی وەزارەتەكان یاخود لەڕووی هاوتاكردنی مووچەی خانەنشینان، بۆیە پێشبینی دەكرێت بۆ ئەم مانگە وەزارەتی دارایی عێراق پێویستی بەكاتی زیارت هەبێت بۆ ئەوەی بڕیار لەسەر ناردنی پارە بدەن بۆ هەرێم.

ئەو بەرپرسەی وەزارەتی دارایی و ئابوری حكومەتی هەریم ئەوەشی خستەڕوو، ئەو گرفتانەی ئێستا لە لیستی مووچەی فەرمانبەرانی هەرێم هەن هیچیان كەمتر نییە لەو گرفتانەی پێشتر لەنێوان هەولێر و بەغدا هەبوون، چونكە پێشتر گرفتەكان بە دانوستان و گفتوگۆ چارەسەر دەكران بەڵام ئێستا كار گەیشتووەتە ئەوەی كە بەنهێنی فەرمانبەری نوێ‌ دادەمەزرێت و دەبێتە بارگرانی بەسەر حكومەتی عێراقەوە ئەمەش لای وەزارەتی دارایی عێراق قەبوڵكراو نییە.