سبەینێ دادگای باڵای فیدراڵی عێراق لەسەر دوو سکاڵای تایبەت بە ھەرێمی کوردستان کۆدەبێتەوە

SNN

بەپێی راگەیەندراوێکی دادگای باڵای فیدراڵی عێراق، بڕیارە سبەی دووشەممە دادگا لەبارەی سکاڵایەکە کۆبێتەوە کە لەلایەن ناوەندی پزیشکیی دەستنیشیانکردن سەر بە نێردەی یاریدەدەرێتی نێودەوڵەتی متمانەپێکراو لە عێراق دژی سەرۆکی حکومەتی ھەرێم تۆمارکراوە.

لە سکاڵاکەدا داواکراوە دادگای باڵای فیدراڵی سێ بڕیاری سەرۆکی حکومەتی ھەرێمی کوردستان ھەڵبوەشێنێتەوە تایبەت بە رێگریکردن لە جێبەجێکردنی یاسای گومرگ و بەشداری عێراق لە رێککەوتنی گواستنەوەی وشکانی و یاسای پەسەندکردنی گواستنەوەی وشکانی نێودەوڵەتی لە نێوان عێراق و تورکیا.

ھەر لە سکاڵاکەدا داوای دەرکردنی فەرمانێکی وەلائی کراوە کە سەرۆکی حکومەتی ھەرێم پابەند بکات بەوەی رێگری نەکات لە ھاوردەکردنی ئەو کەرەستانەی پەیوەندیدارن بە ئەرک و کاری ناوەندی پزیشکیی دەستنیشیانکردن سەر بە نێردەی یاریدەدەرێتی نێودەوڵەتی متمانەپێکراو لە عێراق لە دەروازەکانی ھەرێمی کوردستانەوە.

تەوەری دووەمی دانیشتنەکەی دادگای باڵای فیدراڵی تایبەتە بە تاوتوێکردنی سکاڵایەک لەسەر سەرۆکی پەرلەمانی کوردستان کە داواکراوە بە دەرکردنی بڕیارێک کە ماددەیەکی یاسای نەھێشتن و رێگریکردن لە زیادەڕەوی لەسەر زەوی حکومەتی ھەرێم بە نادەستووری دابنرێت کە تیایدا باس لەوە کراوە نابێت لە قۆناغی لێکۆڵینەوەی سەرەتایی و دادگاییدا کەسی زیادەڕۆکار ئازاد بکرێت تا ئەو کاتەی زیادەڕەوییەکەی لانەبات.