هێرشکرایە سەر بارەگای گەورەترین حزبی کوردی لە تورکیا

SNN

شەوی رابردوو لە ئەنقەرەی پایتەختی تورکیا هێرشکرایە سەر بارەگای دەم پارتی کە گەورەترین حزبی کوردییە لەو وڵاتە.

ئایشەگوڵ دۆغان وتەبێژی پارتی دیموکراسی و یەکسانی گەلان (دەم پارتی) رایگەیاند: “لە نیوەشەودا هێرشکراوەتە سەر بارەگای سەرەکیمان کە باگلاتی ئەنقەرە کە ناوچەیەکی قەرەباڵغی ذارەکەیە و بارەگای چەندین حزبی دیکەش لەو ناوچەیە”.

راشیگەیاندووە: “وەک لە وێنەکاندا دەبینرێت شوشەی دەرگا و پەنجەرەی بیناکە شکێندراون و هەوڵیش دراوە تابلۆی بیناکە بخرێتەخوارەوە.”

وتەبێژی دەم پارتی ئەو هەوڵەی بە ئاژاوەگێری ناوبردووە و جەختی کردووەتەوە کە ئەو جۆرە هێرشانە نایانوەستێنێت و نایانترسێنیت.

ئایشەگوڵ دۆغان داواشی لە عەلی یەرلیکایا وەزیری ناوخۆی تورکیا دەستبەجێ بێتە سەرخەت و رێکار بگرێتەبەر و هێرشبەران راپێچی بەردەم دادگا بکات.

هاوکات میدیای تورکیا بڵاویانکردەوە، لەسەر هێرشەکە کەسێک بە ناوی “هـ. ج. ئـ” دەستگیرکراوە.

ئەم هێرشە دوو رۆژ دوای هێرشێکی چەکداری بۆ سەر کارگەیەکی دروستکردنی فڕۆکەی بێفرۆکەوان لە ئەنقەرەدێت کە بەهۆیەوە شەش کەس کوژران و چەندین کەسی دیکەش برینداربوون.