ئێران: هێرشەکەی ئیسرائیل زیانێکی کەمی هەبوو

SNN-

کاتژمێر 5:00ی بەیانی ئەمڕۆ، فرۆكە جەنگییەكانی سوپای ئیسرائیل هێرشێكی ئاسمانی فراوانیان كردە سەر ئێران، سوپای ئیسرائیل دەڵێت:20 پێگەمان کردووەتە ئامانج، بارەگای بەرگری ئاسمانیی ئێرانیش دەڵێت: هێرشەکان زیانێکی کەمیان هەبووە”.

سوپای ئیسرائیل رایگەیاند: گورزی وردیان وەشاندووە لەچەند ئامانجێكی سەربازی لە چەند ناوچەیەكی ئێران، كە كارگەی دروستكردنی موشەكی بوون و كە هێرشەكانی سەر ئیسرائیلدا بەكارهێنراون.

دەشڵێت:” موشەكی زەمین بە ئاسمان و تواناكانی ئێران لە فرۆكەی بێفركەوانیش كراونەتە ئامانج، گورزەكەش لەوەڵامی هێرشە موشەكییەی تاراندا بووە بۆ سەر ئیسرائیل.

هەروەها پێگەی ئەكسیۆسی ئەمریکی بڵاویكردووەتەوە و دەڵێت: کە ئیسرائیل رۆژی هەینی پەیامی ناردووە بۆ ئێرانییەكان و ئاگاداری كردوونەتەوە لە هێرشەكەی، هۆشدارییەكەی ئیسرائیل بۆ ئەوە بووە سنورێك بۆ هێرشكردنە سەر یەكتر دابنێت و، رێگە لە ئاڵۆزبونی زیاتری دۆخەكە بگرێت.

بەڵام بارەگای بەرگری ئاسمانیی ئێران راگەیەنراوێکی بڵاوکردەوە و دەڵێت:”ئیسرائیل هێرشی کردووتە سەر چەند بنکەیەکی سەربازیی لە پارێزگاکانی تاران و خوزستان و ئیلام، بەڵام سیستمی بەرگریی موشەکی بەرپەرچی هێرشەکەی داوەتەوە و تەنیا چەند زیانێکی کەم بەر ئەوناوچانە کەوتووە و لێکۆڵینەوەش لە هێرشەکە دەستی پێکردووە”.

داواشی لە خەڵکی ئێران کردووە، یەکگرتوویی و ئارامی خۆیان بپارێزن و گوێ بەو دەنگۆیانە نەدەن کە لە میدیاکانی دوژمن بڵاودەبێتەوە.

درەنگانی شەوی رابردوو ئیسرائیل نزیکەی 20 پێگەی سەربازیی ئێرانی لەناوخۆی وڵاتەکەی بۆردومان کرد و دواتر سوپای ئیسرائیل رایگەیاند، هێرشەکە سەرکەوتوو بووە و ئامانجەکانیان پێکاوە.