گەشتە ئاسمانییەکانی عێراق دەستیانپێکردەوە

SNN-

ئەمڕۆ شەممە، رەزاق موهەیباس ئەلسەعداوی، وەزیری گواستنەوە و گەیاندنی عێراق، دەستپێکردنەوەی سەرجەم گەشتە ئاسمانییەکانی لە سەرجەم فڕۆکەخانەکانی عێراقی ڕاگەیاند، دوای ئەوەی بەهۆی بەهۆی هێرشەکانی ئیسرائیل بۆ سەر ئێران راگیران.

وەزارەتی گواستنەوە و گەیاندنی عێراق لە راگەیەندراوێکدا بڵاویکردووەتەوە و دەڵێت:”دوای تێپەڕاندنی هەموو ئەو مەترسیانەی کە ئەگەری هەبووە کاریگەرییان لەسەر ئاسایش و سەلامەتی فڕۆکەوانی مەدەنی لە عێراق هەبێت، وەزیری گواستنەوە ڕێنمایی دەکات دووبارەکردنەوەی ئاسمانی عێراق بەڕووی فڕۆکە مەدەنییەکان بکرێتەوە.

لە ڕاگەیەندراوەکەدا هاتووە”کۆمپانیای گشتی بۆ بەڕێوەبردنی فڕۆکەخانەکان و کەشتیوانی ئاسمانی دەستیکردووە بە کارکردن بۆ وەرگرتنی فڕۆکەی هاتوو و ڕۆیشتن و ترانزێت و بەڕێوەبردنی ئاسمانی عێراق”.

ئاماژەی بەوەشکرد، “کۆمپانیای گشتی بۆ هێڵی ئاسمانی عێراق گەشتەکانی دەستپێدەکاتەوە و ڕێگاکانی بۆ سەرجەم شوێنەکانی کارا دەکات هاوکات لەگەڵ کردنەوەی ئاسمانی عێراق بەڕووی جوڵەی فڕۆکەکاندا”.