“ئامادەین شوێنێك بۆ بانکی رەشید ئامادەبکەین تا گرفت دروست نەبێت و کارەکانیان خێراتربێت”
د. بڕیار رەشید
SNN-عەلی حەمەسەعید
پەرلەمانتارێكی كورد لە ئەنجومەنی نوێنەرانی عێراق ئاماژە بەوەدەكات، رەزامەندی بۆ كردنەوەی لقی بانكی رەشید لە سلێمانی وەرگیراوە و بە زووترین كات جێگایەكیان بۆ دابیندەكرێت و كاروبارەكانی دەستپێدەكات.
د.بڕیار رەشید ئەندامی ئەنجومەنی نوێنەرانی عیراق لە فراكسیۆنی یەكێتی بە SNNی ڕاگەیاند: دوای هەوڵەبەردەوامەكانمان بۆ كردنەوەی لقی بانكە فیدراڵییەكان لە هەرێمی كوردستان، دواجار توانیمان رەزامەندی بانكی ناوەندی عیراق و وەزارەتی دارایی عیراق وەربگرین بۆ كردنەوەی لقی بانكی رەشید لە پارێزگای سلێمانی.
ئاماژەی بەوەشكرد، دوای وەرگرتنی ڕەزامەندییەكە قۆناغی دواتر شوینێك بە كرێ وەردەگیرێت بۆئەوەی بۆ بانكەكە بەكاربهێندرێت، بۆ ئەومەبەستەش وەك یەكێتی نیشتمانی كوردستان و نوێنەرانی پارێزگای سلێمانی لە ئەنجومەنی نوێنەران ئامادەین شوێنێك بۆ بانكەكە دابین بكەین تا گرفتیان بۆ دروست نەبێت و كاروبارەكانیان خێراترببێت.
ئەو پەرلەمانتارەی فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، بەكردنەوەی لقی بانكی ڕەشید لە سلێمانی هەنگاوەكانی تەوتینی مووچەی فەرمانبەرانی سلێمانی خێراتر دەبن قۆناغێكی زۆر باشمان بڕیوە و ئومێد دەكەین ئەو هەنگاوانەی كە ماون بخرێنە بواری جێبەجێكردنەوە.
