بەسەدان کەس لە شارەزوور تووشی سکچوون و رشانەوە بوون

کۆچەر هەمزە-SNN

لەماوەی کەمتر لە 24 کاتژمێردا بەسەدان کەس لە قەزای شارەزوور تووشی سکچوون و رشانەوەبوون و گەیەندراونەتە نەخۆشخانە، قائیمقامی قەزاکەش لەو بارەوە زانیاری ئاشکرا دەکات.

رزگار غەفور قائیمقامی شارەزوور بە SNNی راگەیاند، ” ژمارەیەکی زۆر لە دانیشتووانی قەزاکە تووشی سکچوون و رشانەوە بوون و سەردانی نەخۆشخانەیان کردووە و پێشبینی دەکرێت بەهۆی لافاوەکەی ئەم دواییەوە ئاوی خواردنەوە خوێندنگەیەک پیسبووبێت و لەوێوە تەشەنەی سەندبێت”.

وتیشی: “داوامان کردووە لە سلێمانییەوە دوو تیمی خۆپارێزی و تەندروستی بۆ پشکنین ئاو سەردانی شارەزوور بکەن.”

دەربارەی ئەوەی ئایا بۆ رێگریکردن لە زیاتر تەشەنەسەندنی سکچوون و رشانەوە پشوو رادەگەیەنن، وتی، تائێستا هیچ بڕیارێک بۆ راگەیاندنی پشوو نییە، بەڵام بابەتەکەیان لەگەڵ پەروەردە تاوتوێ کردووە.

بەپێی چەند سەرچاوەیەک تەنیا لە ماوەی 24 کاتژمێری رابردوودا نزیکەی 500 کەس لە شارەزوور بە هۆی تووشبوونیان بە سکچوون و رشانەوە گەیەندراونەتە نەخۆشخانە و زانیارییەکان ئاماژە بەوەدەکەن، کە نزیکەی 200 کەسیان دانیشتووی ناحیەی زەڕایەنن.