حکومەتی هەرێم هۆکاری کێشەی مووچەیە

SNN

مامۆستا عەبدولواحید محەمەد سەرۆکی یەکێتی مامۆستایانی کوردستان رایدەگەیەنێت:” حکومەتی هەرێم هۆکاری کێشەی مووچەیە، بەتایبەت مووچەی مامۆستایان و ئامادە نییە بڕیاری دادگای فیدراڵی ژمارە 111 لە 21ی شوباتی ئەمساڵ جێبەجی بکات و لە رێی هەژماری بانکییەوە مووچە بدات و کردنەوەی بانکی حکومیش بەچارەسەری ئەو کێشەیە دەزانێت”.

سەرۆکی یەکێتی مامۆستایان لەوتاریکیدا کە بە ماڵپەڕی فەرمی یەکێتی راگەیاند:” دەبێت حکومەتی مەرکەزی مانگانە مووچە لە رێگەی ژمارە حسابی بانکیەوە بدات هەروەها پرۆژە یاسای بودجەی ساڵی 2024 ژمارە 12، تەئکیدی لەوە کردۆتەوە کە دەبێت مووچەکان لە کاتی خۆیدا بدرێت و حکومەتی هەرێمیشی پابەند کردووە دەقی ماددە و بڕگەکان وەکو خۆی جێبەجێ بکات، بەڵام حکومەتی هەرێم هێشتا ئامادە نیە ئەو بڕیارانە جێبەجێ بکات کە تەواو لە بەرژەوەندی مامۆستایان و مووچە خۆرانە”.

مامۆستا عەبدولواحید دەڵێت:” ئەم حکومەتی هەرێمە ئامادە نیە ژمارە حساب بە پێی بڕیاری دادگای باڵا لە بانکە حکومیەکان بکاتەوە، بە بیانوی ئەوەی خۆی ژمارە حساب لە بانکە ئەهلیەکان دەکاتەوە، لە لایەکیتر کە تا ئێستا ژمارە حساب نەکراوەتەوە دەبێت لیستی موچە مانگانە بنێرنە لای وەزارەتی دارایی حکومەتی مەرکەزی، لە مانگی دووەوە تا ئێستا یەک مانگ بە رێکوپێکی مووچە نەنێردراوە هەموو جارێ کێشەی تێدابووە و دەیتەهۆکاری دواکەوتنی مووچە”.