لەبارەی پاڵاوگە نایاساییەكانی هەولێر بەرپرسان تەنها بڕیار دەردەكەن و بەركردارجێبەجێی ناكەن
SNN-عەلی حەمە سەعید
دوای ئەوەی چەند جارێك سەرۆكی حكومەت و پارێزگاری هەولێر بڕیاری لەسەر داخستنی پاڵاوگە نایاساییەكان دەردەكەن، بەڵام بەوتەی هاووڵاتیانی دانیشتووی هەولێر بەرپرسان تەنها بڕیار دەردەكەن و دواتر جێبەجێ ناكرێن و ڕۆژ بەڕۆژ ژینگەی هەولێر ژەهراویتر دەبێت.
وەلید سادق، یەكێك لە هاووڵاتیانی شاری هەولێر بە SNNی ڕاگەیاند: ئەو بڕیارانەی كە لەلایەن سەرۆكی حكومەت و پارێزگاری هەولێرەوە لە بارەی ژینگەی هەولێر و داخستنی پاڵاوگە نایاساییەكان و مۆلیدە ئەهلییەكان دەردەكرێن، تەنها بۆ ئەوەیە ئەو بابەتە لە بیری هاووڵاتیان ببەنەوە و دواجار كە دێتە سەر جێبەجێكردنی بڕیارەكان لایەنە پەیوەندیدارەكان چاوپۆشی لە جێبەجێكردنی بڕیارەكان دەكەن.
ئاماژەی بەوەشكرد، ئێمە چەندین جار هاوارمان كردووە كە ژینگەی هەولێر بە كەڵكی ژیانكردن نەماوە و هەوای ئاسمانی هەولێر بە تەواوی ژەهراوی بووە، بەڵام بەهۆی ئەوەی بەرپرسانی ئەم سنوری بەرژەوەندی مادییان لەو بابەتە هەیە ئامادە نیین دەست لەو بەرژەوەندییە مادییە هەڵبگرن و لەبەرامبەردا ئامادەن هەزاران هاووڵاتی ئەم شارە بكەنە قوربانی بەرژەوەندییەكانیان.
بەگوێرەی بەدواداچوونەكانی SNN تا ئێستا زیاد لە حەوت جار لەلایەن سەرۆكی حكومەت و پارێزگاری هەولێر و بەرپرسانی ژینگەی هەولێرەوە بڕیاری داخستنی پاڵاوگە نایاساییەكان دەركراوە، بەڵام دواجار بڕیارەكان جێبەجێنەكراون ئەو پاڵاوگانە بەردەوامن لە كاركردن و ڕۆژانە ڕێژەیەكی زۆر غازی ژەهراوی تێكەڵ بەهەوای هەولێر دەكەن.
