“سەرۆك بافڵ هەمیشە لەخەمی چارەسەری كێشەی مووچەدا بووە، بەڵام ئەمەی نەكردووە موزایەدەی سیاسی”
عەلی حەمە سەعید-SNN
لەچوارچێوەی كاردانەوەكانی تایبەت بە ڕێككەوتنی سێ قۆڵی بۆ هەناردەكردنەوەی نەوتی هەرێم، پەرلەمانتارێكی عێراق ئاماژە بەوەدەكات سەرۆكی یەكێتی ڕۆڵی سەرەكی و كاریگەری هەبووە لە گەیشتن بەم ڕێككەوتنە، بەڵام نە لەڕاگەیاندنەكان خۆی دەرخستووە و نە كردوویەتی بە موزایەدەی سیاسی.
سروە محەمەد، ئەندامی ئەنجومەنی نوێنەرانی عێراق بە SNNی ڕاگەیاند: ئەو ڕێككەوتنەی كە بۆ دەستكردنەوە بە هەناردەكردنەوەی نەوت هاتووەتە ئاراوە هەنگاوێكی گرنگە بۆ چارەسەركردنی كێشەی مووچەی فەرمانبەرانی هەرێم و دابەشكردنی مووچە لەكاتی خۆیدا و ڕێگریكردن لە فەوتانی مووچەی فەرمانبەران لە ئەمساڵدا.
ئاماژەی بەوەشكرد، جێگای خۆیەتی كە باس لە ڕۆڵی سەرۆك ( بافڵ جەلال تاڵەبانی) بكرێت كە هەموو كات لەسەردانەكانیدا بۆ بەغدا كاری لە پێشینەی لە كۆبوونەوەكانی لەگەڵ سەركردە و بڕیار بەدەستدانی بەغدا كاركردن و گفتوگۆگردن بووە بۆ چارەسەركردنی گرفت و ڕێگرییەكانی بەدەم مووچەی فەرمانبەران، هەر لەو چوارچێوەیەشدا ئەم ڕێككەوتنە هاتە ئاراوە كە كۆتایی بە كێشەی نەوت هێنا لەنێوان هەولێر و بەغدا.
ئەو پەرلەمانتارەی عێراق ئەوەشی خستەڕوو، ئەوەی هەوڵەكانی سەرۆك ( بافڵ جەلال تاڵەبانی) جیادەكاتەوە لە هەوڵی ئەو كەسانەی كە گوایە لە خەمی چارەسەركردنی كێشەی مووچەدا بوون ئەوەیە كە، سەرۆكی یەكێتی ئەم هەوڵانەی كە خستوویەتییە گەڕ وەك موزایەدەی سیاسی و بۆ خۆدەرخستن نەبووە لە ڕاگەیاندنەكانەوە، بەڵكوو مەبەستی بووە بەهەر نرخێك بێت گرفتی مووچەی فەرمانبەران چارەسەر بكرێت، كە ئەوە ڕێگا ڕاستەكەیە.
