نوسینگەی سودانی: سەرۆکوەزیرانی عێراق پەیوەندیی بە چوار بەرپرسی کوردەوە کردووە

SNN

نوسینگەی سودانی رایگەیاندووە، ئەمڕۆ سەرۆکوەزیرانی عێراق، لەبارەی هەناردەکردنەوەی نەوتی کوردستان، پەیوەندی تەلەفۆنی لەگەڵ هەریەک لە؛ سەرۆکی پارتی و سەرۆکی یەکێتی و سەرۆکی هەرێمی کوردستان و سەرۆکوەزیرانی هەرێمی کوردستانەوە کردووە.

لە راگەیەنراوەکەی نوسینگەی سەرۆکوەزیرانی عێراقدا هاتووە، ئەمڕۆ شەممە، محەمەد شیاع سودانی، سەرۆکی ئەنجومەنی وەزیران پەیوەندییەکی تەلەفۆنی ئەنجامدا، لەگەڵ هەریەک لە؛ بافڵ تاڵەبانی سەرۆکی یەکێتی نیشتمانی کوردستان و مەسعود بارزانی سەرۆکی پارتی دیموکراتی کوردستان، نێچیرڤان بارزانی سەرۆکی هەرێمی کوردستان، مەسرور بارزانی سەرۆکی حکومەتی هەرێمی کوردستان.

ئاماژەی بەوەکردووە، سودانی لە پەیوەندییەکانیدا ستایشی هەڵوێستەکانی سەرکردایەتی و هێزە کوردستانییەکانی کرد، کە بەشداربوون لە گەیشتن بە ڕێککەوتننامەی ئەم دواییە بۆ دەستپێکردنەوەی هەناردەکردنی نەوتی خاوی بەرهەمهاتوو لە هەرێم و ڕادەستکردنی داهاتەکانی بۆ گەنجینەی ناوەندی، پاڵپشتییان بۆ بەرژەوەندییەکانی گەلی عێراق لە هەموو شوێنێک، هەروەها هەوڵە هاوبەشەکانی نێوان حکومەتی فیدراڵی و حکومەتی هەرێم کە بووە هۆی ڕێککەوتن بەپێی دەستوور و یاسای بودجە.

هاوکات، جەخت کرایەوە لەسەر بەردەوامبوون لە هەموو ئەوانەی گەشەپێدانی نیشتمانی بەهێز دەکەن، و بەرژەوەندی نیشتمانی گشتگیر پێشدەخەن، و ئامانجە هاوبەشەکانی گەیشتن بە پێشکەوتنی ئابووری گشتگیر، و پاراستنی سامان و دابەشکردنی دادپەروەرانەی بۆ هەموو گەلی عێراق لە سەرانسەری عێراقدا بەرجەستە دەکەن.

لە کۆتایی راگەیەنراوەکەدا هاتووە، جەختکرایەوە لەسەر پشتگیریکردنی وەبەرهێنان لە عێراقدا، چونکە بزوێنەری سەرەکییە بۆ دروستکردنی گەشەپێدانی گشتگیر لە وڵاتدا، و دروستکردنی گۆڕانکارییەکی کوالیتی لە ئابووری عێراقدا.