تەنها لە مانگی رابردوو لە هەولێر سەگ پەلاماری 81 کەسیان داوە

عەلی حەمە سەعید- SNN
بەوتەی هاووڵاتیانی دانیشتووی گەڕەكە جیاوازەكانی هەولێر تا دێت سەگی بێلانە لە گەڕەك و كوچە و كۆلانەكانی هەولێر ڕوو لە زیاد بوون دەكەن مەترسی لەسەر ژیانی چین و توێژە جیاوازەكانی ئەو گەڕەكانی هەولێر دروستكردووە، تەنها لەمانگی ڕابردوو81 هاووڵاتی لەلایەن سەگەوە پەلاماردراون.

نازم سوڵتان، یەكێك لە هاووڵاتیانی دانیشتووی هەولێر بە SNNی ڕاگەیاند: بەهۆی زۆربوونی ژمارەی سەگی بێلانە لەناو گەڕەك و كۆڵان و شەقامەكانی شاری هەولێر و رووداوی گەستنی هاووڵاتیان زیادیكردووە، تەنانەت زۆر جار هەر بەهۆی پەلاماردانی سەگی بێلانەوە منداڵ و ژن و كەسانی بەتەمەنیش بوونەتە قوربانی و گیانیان لەدەستداوە، ئێستا دۆخەكە بەجۆرێك ناتوانین بە بێ‌ ترس منداڵەكانمان بنێرینە دەرەوە، بەڵكوو دەبێت خۆمان بەردەوام چاودێرییان بكەین.

ئاماژەی بەوەشكرد، چەندین جار سەردانی شارەوانی و پارێزگار و لایەنە پەیوەندیدارەكانمان كردووە ئەوەیان ئەوەیان پێیوتین كە ئێستا شێڵتەرێكی تایبەتیان بۆ كۆكردنەوەی سەگی بێلانە لە دەرەوەی هەولێر دروستكردووە و دەستیان بە كۆكردنەوەی سەگی بێلانە كردووە، بەڵام ئەو شێلتەرەش هێشتا نەیتوانیوە ژمارەی سەگی بەرەڵا لە كوچە و كۆڵانەكانی هەولیر كەمبكاتەوە هێشتا مەترسی جدین بۆ سەر دانیشتووانی دەیان گەڕەكی هەولێر.

بەگوێرەی ئامارەكانی نەخۆشخانەی ڕزگاری هەولێر كە ئەمڕۆ بڵاویكردوونەتەوە ، لە مانگی 10ی ڕابردووی ئەمساڵدا لە نەخۆشخانەكەیاندا 81 حاڵەتی گەستنی سەگ تۆماركراوە.

ئەوەش لە كاتێكدایە كە پێشتر حەسەن ئیسماعیل، بەڕێوەبەری شێڵتەری تایبەت بەكۆكردنەوەی سەگی بێلانە لە هەولێر  ئەوەی بە SNN رایگەیاندبوو :تائێستا  زیاتر لە 16 هەزار سەگی بێلانە لەو شێلتەرە كۆكراوەتەوە و بە گشتیی جێگەی 40 هەزار سەگی تێدا دەبێتەوە، هاوكات تا ئێستا حەوت هەزار و 500 سەگ نەشتەرگەری نەزۆك كردنیان بۆ كراوە، رۆژانە نزیكەی 12 تۆن گۆشتی مریشكیان بۆ دەهێنین لە سەربڕینخانەكانی هەولێر كە بە خۆڕایی بۆمان دابین دەكەن.