کۆریای باشوور داوای ئەمریکا بۆ بەشداری لە جەنگی دژی ئێران ڕەتدەکاتەوە

SNN –

سەرۆکی کۆریای باشوور، لی جای میۆنگ، لە لێدوانێکدا بۆ ڕۆژنامەنووسان ئاشکرای کرد کە وڵاتەکەی بە هیچ شێوەیەک سەرباز یان کەرەستەی سەربازی ڕەوانەی ناوچەی گرژییەکان ناکات و بە تەواوی پابەندی بنەمای بێلایەنی دەبێت لە جەنگی بەردەوامی دژی ئێراندا.

سیئۆل بە فەرمی بەشداریکردنی لە هاوپەیمانییە سەربازییەکاندا ڕەتکردەوە و ڕایگەیاند کە کارەکانیان تەنیا لە سنوری پاراستنی کەشتییە بازرگانییەکان و دابینکردنی ئاسایشی گواستنەوەی نەوتی خۆیاندا دەمێنێتەوە.

ئەم لێدوانە دوای بڵاوبوونەوەی زانیاری دەربارەی ئەگەری ناردنی هێزی دەریایی کۆریای باشوور بۆ گەرووی هورمز هات، کە لەلایەن سەرۆکی ئەو وڵاتەوە بە تەواوی ڕەتکرایەوە.

ئەم بڕیارەش ناڕەزایەتی توندی دۆناڵد ترەمپ، سەرۆکی ئەمریکای لێکەوتووەتەوە، کە پێشتر رەخنەی لە کەمتەرخەمیی هاوپەیمانەکانی گرتووە لە پشتیوانیکردنی واشنتن.

سەرەڕای بوونی نزیکەی 28,500 سەربازی ئەمریکی لە خاکی کۆریای باشووردا، هەڵوێستە توندەکانی ترەمپ نیگەرانیی لای بەرپرسانی سیئۆل دروستکردووە بەرامبەر بە داهاتووی چەتری ئەمنیی ئەمریکا.