SNN-
سی ئێن ئێن بڵاویکردوەتەوە، سەرۆککۆماری ئێران و وەفدەکەی لەژێر رێکارێکی توندی ئەمنیدان و دەبێت چالاکیەکانیان تەنها لە بارەگای نەتەوە یەکگرتووەکاندا بێت، رێگەی چونە فرۆشگاگەورەکان وکرێنی کەلوپەلیشیان پێنادرێت.
سی ئێن ئێن لە زاری لێپرسراوێکی ئەمریکاوە بڵاویکردووەتەوە، پاراستنی ئاسایشی مەسعود پزیشکیان، سەرۆککۆماری ئێران لە کاتی بەشداریکردنی لە کۆبوونەوەی کۆمەڵەی گشتیی رێکخراوی نەتەوە یەکگرتووەکان، بە شێوەی راستەوخۆ دەسپێردرێتە هێزی نهێنی ئەمریکا و لە هەمان کاتدا، ئاسایشی ئەندامانی دیکەی وەفدەکەی تاران لەلایەن هێزی ئاسایشی دیپلۆماسیی وەزارەتی دەرەوەی ئەمریکاوە دەپارێزرێت.
هاوکات، لێپرسراوێکی وەزارەتی دەرەوەی ئەمریکا رایگەیاند کە بەرپرسانی تاران تەنها بە مەبەستی نوێنەرایەتیکردنی وڵاتەکەیان لە نەتەوە یەکگرتووەکان مۆڵەتی هاتنەژوورەوەیان پێدراوە و دەبێت چالاکییەکانیان تەنها لە چوارچێوەی کاروباری ئەو ڕێکخراوەدا بنوێنن.
سی ئێن ئێن ئاماژەی بەوەشکردووە، بەپێی رێکارەکان، ئەگەر بڕیار بێت وەفدەکە بچنە دەرەوەی ناوچەی دەوروبەری بارەگای نەتەوە یەکگرتووەکان، فڕۆکەخانەی نێودەوڵەتیی کێنیدی، یان نوێنەرایەتیی ئێران، دەبێت پێشوەختە داوای مۆڵەتی رەسمی بکەن.
وتەبێژی وەزارەتی دەرەوەی ئەمریکا جەختی کردەوە، کە بڕیارەکەی ساڵی ڕابردووی ئیدارەی ترەمپ هێشتا کاریپێدەکرێت و بەپێی ئەوە لێپرسراوانی ئێران مافی کڕینی کەلوپەلی گرانبەها و سەردانیکردنی فرۆشگە گەورەکانی ئەمریکایان لێ قەدەغە کراوە.
