گەشتی ئاسمانیی فڕۆکەخانەی نێودەوڵەتیی نەجەف لەگەڵ ئێران بەردەوامە

SNN-

عەمار توفەیلی، بەڕێوەبەری راگەیاندنی فڕۆکەخانەی نێودەوڵەتیی نەجەف رایگەیاند، گەشتی ئاسمانیی نێوان فڕۆکەخانەی نێودەوڵەتی نەجەف و ئێران بەردەوامە، تاوەکو ئێستا هیچ بڕیارێکیان لەبارەی راگرتنیان بەدەست نەگەیشتووە و کاروبارەکان بە شێوەیەکی ئاسایی بەڕێوەدەچن.

ئاماژەی بەوەشکرد، تاوەکو ئێستا هیچ گەشتێکمان هەڵنەوەشاوەتەوە و ئەمڕۆ 15 گەشتی نێوان فڕۆکەخانەی نێودەوڵەتی نەجەف و کۆماری ئیسلامی ئێران هەیە.

عەمار توفەیلی وتیشی، هەردوو کۆمپانیای مێنزیس و ناس لە فڕۆکەخانەی نەجەف کارناکەن و کۆمپانیایەکی دیکە بەناوی (تراڤلس) کارەکانیان بۆ دەکات، وەک بۆردینگ و تیکت و خزمەتگوزاریی دیکە، کە تاوەکو ئێستا هیچ ئاگادارکردنەوەیەکی پێنەداون.

ئەمەش لە کاتێکدایە سەرچاوەیەکی باڵا لە فڕۆکەخانەکانی عێراق رایگەیاندووە، فڕۆکەخانەی نێودەوڵەتی نەجەف، ئیدارەیەکی تایبەتی خۆی هەیە. بەڕێوەبەری راگەیاندنی فڕۆکەخانەی نێودەوڵەتیی نەجەف-یش ئەمەی پشتڕاست کردەوە.