تورکیا رەگەزنامە دەبەخشێتە سەرکردەکانی بزوتنەوەی حەماس

SNN

رۆژنامەی تەلەگرافی بەریتانی بڵاویکردووەتەوە، تورکیا رەگەزنامەی بەخشیووەتە سەرکردەکانی بزوتنەوەی حەماس لەکاتێکدا هەڕەشەکانی ئەو بزوتنەوەیە بۆ هێرشکردنە سەر ئیسرائیلییەکان بەردەوامە.

رۆژنامەکە ئەوەشی نوسیووە، سەرکردەکانی حەماس لە تورکیا رەگەزنامە و پاسپۆرتیان وەرگرتووە و بەشێکیشیان ناوی خوازیاریان بۆ بەکارهێندراوە.

رۆژنامەکە لە بەدواداچوونەکەیدا ئەوەی خستووەتەڕوو، ئەو کەسانەی سەر بە حەماسن و رەگەزنامەی تورکییان وەرگرتووە چەکدارانی ئاسایی ناو بزوتنەوەکە نین بەڵکو سەرکردە و باڵادەستی حەماسن و کاریان کۆکردنەوەی داهاتە بۆ بزوتنەوەکەیان و پیلاندانان بۆ بەئامانجگرتنی ئیسرائیل.

تەلەگراف لە راپۆرتێکی پێشتریدا ئەوەی بڵاوکردبووەوە: تورکیا میوانداری ژمارەیەکی زۆر لەو کەسانە دەکات کە بە کاری “تیرۆر” تۆمەتباردەکرێن، لەوانەش گروپی ئیخوان و رێکخراوە توندڕەوەکان، هەروەک ساڵی رابردوو دەرگای بەرووی چەکدارانی رێکخراوە توندڕەوەکانی سوریا کردەوە و ئەوەش پرسیاری لەسەر پەیوەندی نێوان وڵاتەکە و گروپە تیرۆرستییەکان دروستکردووە.