دوای ئیمارات.. ئیسرائیل بەنیازە سێ وڵاتی دیکەی عەرەبی ئاشتبکاتەوە
بنیامین نەتانیاهوو سەرۆک وەزیرانی ئیسرائیل | فۆتۆ: AFP
SNN
وەزارەتی هەواڵگریی ئیسرائیل رایگەیاند “دوای ئاساییبوونەوەی پەیوەندییەکان لەگەڵ ئیمارات، ئێستا دۆخەکە لەبارە بۆ ئاساییبوونەوەی پەیوەندییەکانی تەلئەبیب لەگەڵ سێ وڵاتی دیکەی عەرەبیدا”.
رۆژنامەی تایمز ئۆف ئیسرائیل بڵاویکردۆتەوە “بەپێی پێشبینییەکان و ئەو دەرهاویشتانەی لە راپۆرتەکەی وەزارەتی هەواڵگریدا دەستکەوتوون، رەنگە ئەو سێ وڵاتە هەریەک لە سعودیە و عوممان و بەحرەین بن”.
حکومەتی ئیسرائیل لەئێستادا لەو باوەڕەدایە ئەو وڵاتانە پێویستییان بە بەهێز کردنی لایەنی ئەمنی خۆیان هەیە، لەوانە عەرەبستانی سعودیە و بەحرەینیش دەبێت رووە ئابوورییەکەی بەهێز بکات بە یارمەتی ئیسرائیل.
رۆژی 13ی مانگی ئابی رابردوو بنیامین ناتانیاهو سەرۆكوەزیرانی ئیسرائیل و محەمەد بن زاید شازادەی جێنشینی ئەبوزەبی پەیوەندییەكی تەلەفۆنییان ئەنجامدا و لەسەر ئاساییكردنەوەی تەواوی پەیوەندییەكانی نێوانیان گەیشتنە ڕێككەوتن، دوابەدوای ڕاگەیاندنی ڕێككەوتنەكە، دۆناڵد ترەمپ سەرۆكی ئەمریكا رێككەوتنەكەی بە (مێژوویی) ناوبرد.
