لەپارێزگای هەڵەبجە یەکگرتوو بۆماوەی 15ڕۆژ سەرجەم بارەگاکانی دادەخات

SNN- عەلی حەمە سەعید

لەسەر داوای نەخۆشخانەی وەفاو بەمەبەستی پابەندبوون بە ڕێنماییە تەندروسییەکان و هاوکات زۆربوونی ژمارەی تووشبوون بە کۆرۆنا، یەکگرتووی ئیسلامی بۆماوەی 15 رۆژ سەرجەم بارەگاکانی لەسنووری پارێزگای هەڵەبجە دادەخات.

حەسەن شێخ عەبدوڵا، ئەندامی سەركردایەتی و بەرپرسی مەڵبەندی هەڵەبجەی یەكگرتووی ئیسلامی بە SNNی ڕایگەیاند: وەک بەدەمەوەچونێک بۆداواکەی تیمی رووبەڕووبوونەوەی کۆرۆنا لەنەخۆشخانەی وەفا لەهەڵەبجە کەداوایان لە هاووڵاتییان و لایەنە سیاسییەکان کرد خۆپارێزی ئەنجامبدەن بەهۆی زۆربوونی حاڵەتەکانی تووشبوون بەکۆرۆنا، لەلایەن لێژنەیەكی نەخۆشخانەی وەفا پەیوەندمان پێوەكرا بەمەبەستی رێگریكردن لەبڵاوبوونەوەی ڤایرۆسی كۆرۆنا بڕیارماندا بارەگاکانمان دابخەین.

بڕیارماندا کە بۆماوەی 15ڕۆژ سەرجەم بارەگاكانمان لە سنووری پارێزگای هەڵەبجە دابخەین بەمەبەستی رێگریكردن لە بڵاوبونەوەی ڤایرۆسی کۆرۆنا و هیچ جۆرە چالاکییەک ئەنجام نادەین.

بەرپرسەکەی مەڵبەندی هەڵەبجەی یەكگرتووی ئیسلامی ئەوەشی خستەڕوو، “پزیشکان و کارمەندانی تەندروستی نەخۆشخانەی وەفای تایبەت بەنەخۆشانی كۆرۆنا توانیویانە خەمخۆرانە لەخزمەت هاووڵاتییان و تووشبووانی ڤایرۆسی كۆرۆنادا بن، بۆیە دەبێت هاووڵاتییانیش خۆپارێزی ئەنجام بدەن و ئەرکی سەرشانی ئەوانی قورستر نەکەن”.