بەم زووانە شاندی هەرێم دەگەڕێتەوە بەغدا

SNN- بڕیار محەمەد

بڕیاروایە لە ئایندەیەکی نزیک شاندی هەرێمی کوردستان بۆ گفتوگۆکردن لەسەر پرسی بوودجە و شایستە داراییەکانی هەرێمی کوردستان بچنەوە بەغدا و لەگەڵ سەرۆکوەزیرانی عێراق و سەرۆککۆماریش کۆببنەوە.

سەرچاوەیەک لە شاندەکە بە  SNNی راگەیاند: بڕیاروایە لە داهاتووێکی نزیک شاندی حکومەتی هەرێمی کوردستان بچێتەوە بەغدا.

وتیشی: لەکۆبوونەوەی ئەمجارە گفتوگۆ دەکەن لەسەر دوو تەوەر یەکەم ناردنی بەشە بوودجەی هەرێمی لەکات و ساتی دیاری کراوی خۆیدا پاش ئەوەی رێکەوتن کرابوو لەسەر ئەو سێ مانگەی ئەمساڵ، دووهەمیش گفتوگۆکردن دەبێت لەسەر پشکی کورد لە بوودجەی ساڵی داهاتوو عێراق.

پێشتر د.دارا رەشید وەزیری پلاندانی حکومەتی هەرێمی کودستان لە وکۆنفراسێکی ڕۆژنامەنووسیدا ڕایگەیاندبوو كێشەكانی نێوان هەرێم و بەغدا لەسەر بوودجە كێشەی بڕی ئەو نەوتە بوو كە 250 هەزار بەرمیل بوو” بە گوێرەی پرۆژەیاسایی بودجەی ساڵی 2019 نەوت بنێردرێت یا نەنێردرێت پێویستە بوودجە رەوانە بكرێت” بەڵام دەتوانرێت پارەی ئەو 250 هەزار بەرمیلە بگەڕێندرێتەوە، ئەوە بوو لە بوودجەی ساڵی 2019 بەم شێوەیە جێبەجێ‌ كرا.

راشیگەیاندبوو: نزیكبوونەوەی زۆر باش هەیە لەنێوان هەردوولا بەشێوەیەك لە بوودجەی ساڵی 2019 رێككەوتنێك هەبوو لەنیوانمان و كێشە لە 250 هەزار بەرمیل نەوتەكە بوو هەرێم نەوتەكەی نەنارد و بەغداش پارەكەی بەزیادەوە رەوانە كرد.