هەولێر.. زیاتر لە 500 خوێندکار بوونەتە قوربانی بڕیارێکی وەزارەتی خوێندنی باڵا
وێنەی گردبوونەوەکە
SNN- بڕیار محەمەد
ئەمڕۆ یەکشەممە بۆ جاری سێهەم خوێندكارانی زانكۆی ستراتفۆردی ئەمریكی لە هەولێر گردبوونەوەیان ئەنجامدا و لە گردبوونەوەکەدا داوایان کرد وەزارەتی خوێندنی باڵا رێگە چارەیەكیان بۆ بدۆزێتەوە بۆ ئەوەی كرێی ساڵێكی خوێندن و رەنج و ماندبوونیان بەهەدەر نەڕوات .
سارە محەمەد، خوێندكارێكی زانكۆ ستراتفۆردی ئەمریكی لە هەولێر بەSNNی راگەیاند “ئێمە ئەوە دووهەمین ساڵی خوێندنمان بووە لەو زانكۆیە و ئێستا وەزارەتی خوێندنی باڵا مۆڵەتی لەو زانكۆیە وەرگرتۆتەوە كەچی چارەنووسی ئێمەش نادیارە”
وتیشی: “كاتێك وەزارەتێك بڕیارێكی لەم شێوەیە دەدات، دەبێت بیر لەوەش بكاتەوە ئێمە چارەنووسمان چی بەسەر دێت” .
وتیشی: “ئێستا خاوەنی ئەو زانكۆیە خەریكی دامەزراندنی زانكۆیەكی ترە و ئەو دەڵێت ئەگەر بێنەوە لای ئێمە دەبێت لەسەرەتاوە دەست بە خوێندن بكەنەوە و هەمیش كرێی تازە بدەن و ئەوەی پێشتر داوتانە حیساب نییە، بۆیە لە نێوان خاوەن زانكۆ و وەزارەتی خوێندنی باڵادا تەنها و تەنها ئێمە زەرمەند بووین”.
پێشتر وەزارەتی خوێندنی باڵا رایگەیاندبوو “بڕوانامەی زانكۆی ستراتفۆردی ئەمریكی لە هەولێر دانپێدانراو نییە و دوای ئەمەش زانكۆكە داخرا و ئێستا چارەنووسی زیاتر لە 500 خوێندكار لەو زانكۆیە نادیارە كە ساڵانە بڕی 45 هەزار دۆلاریان دەدا بۆ پرۆسەی خوێندن” .
