عێراق بە بڕی سەدان ملیۆن دۆلار قەرەبووی کوەیت دەکاتەوە

SNN

لیژنەی قەرەبووکردنەوەکانی سەر بە نەتەوە یەکگرتووەکان رایگەیاند، لە کۆتایی مانگی رابردوو عێراق بڕی 230 ملیۆن دۆلاری وەک قەرەبوو بە کوەیت داوە.

لیژنەکە بە میدیاکانی عێراقی رایگەیاندووە: لە گەڕی 87ـی ئەنجومەنی کارگێڕی لیژنەکەیان کە مانگی رابردوو بەڕێوەچوو، تێیدا هەوڵەکانی عێراق بەرز راگیرا، کە پابەندە بە پێدانی 3% داهاتی فرۆشی نەوت بە سندووقی قەرەبووکردنەوەکان.

هەروەها ئاماژەی بەوەشداوە، لە مانگی تشرینی دووەمی ساڵی رابردووەوە عێراق، ملیارێک و 380 ملیۆن دۆلاری بە کوێت داوەتەوە، لە 27ـی مانگی رابردووش 230 ملیۆن دۆلاری خەرجکردووە، بەوەش تەنیا دوو ملیار و 400 ملیۆن دۆلار قەرەبوو ماوە بیداتەوە.

عێراق لە بەرامبەر داگیرکردنی خاکی کوەیت لە سەردەمی رژێمی بەعسدا، پابەندکراوە بە قەرەبووکردنەوەی ئەو وڵاتە.